Veður í dag: Alskýjað og nokkrir regndropar. 17°/12°
Þá er að bretta upp ermar og byrja á dagbókinni sinni, það er nú búið að taka nokkra daga að koma henni af stað og tvisvar er ég búinn að hætta við og henda öllu saman út aftur. Með góðri aðstoð Þórunnar tókst mér loks að koma þessu af stað, en nú reynir á hvort ég hef þolinmæði til að halda þessum skrifum áfram.
Það hlýtur að vera gott að hleypa svona verkefni af stað á sjálfan páskadaginn.
Við vorum annars búin að ákveða að fara í ferðalag í dag ef það yrði bjart og gott veður, en þar sem það var skýjað frestuðum við ferðinni þar til síðar í þessari viku. Þessi ferð var upphaflega ráðgerð til þess að sjá möndlutrén í blóma, en það er víst í febrúar eða mars sem þau eru í blóma, svo við erum víst nokkuð seint á ferðinni, til að sjá blómin. En landslagið þarna er eins allt árið svo það er allt í lagi að fara þetta núna.
Jón Grétar vinur okkar á Spáni var í morgunn að hjálpa okkur með að skipta um vírusvörn í tölvunni hennar Þórunnar og fartölvunni. Hann er ótrúlega viljugur við að hjálpa okkur með tölvurnar, ef eitthvað kemur upp á. Það má eiginlega segja að hann sé með tölvurnar í gjörgæslu. Þessu var ekki lokið fyrr en klukkan að ganga tvö, svo páskaunginn sem var í bakar ofninum var orðin svolítið leiður að bíða eftir því að hann yrði borðaður. Ég held að hann hafi verið orðinn hræddur um að það hefði enginn list á honum. En maturinn bragðaðist vel, enda vorum við orðin verulega svöng. Til að fá einhverja óhollustu fórum við á kaffihús og fengum okkur tertu og kaffi, sem hvoru tveggja bragðaðist mjög vel. Það er miklu betra að fara á kaffihús og kaupa sér eina kökusneið, en að vera að baka heima og vera svo að narta í kökur af og til. Svo er líka gaman að sitja á kaffihúsi og virða fyrir sér mannfólkið sem þar er.
Það hefur gengið erfiðlega að skrifa þetta, því bæði Ingibergur og Bjarni bróðir minn eru búnir að hringja í mig á meðan á þessum skrifum stóð. Það var samt gaman að þeir hringdu og gáfu sér tíma til að spjalla við mig.