Að pota kartöflunum niður.

Veður: 3,6°/13° úrkoma 5 mm. Skúrir, en bjart á milli skúra.

Þá er lokið við að koma kartöflunum ofan í moldina þetta árið. Niðursetningin er svo sem ekkert þrekvirki, því við setjum bar lítið niður af kartöflum, vegna þess að við getum ekki geymt þær lengi.
Hér er til siðs að skera útsæðið í búta þannig að það sé ein spíra á hverjum bút.
Ég tók mynd af útsæðinu þegar búið var að skera það í búta, einnig tók ég mynd af kartöflunum þar sem þær eru komnar í moldina. Hér eru gerðar svona raufar sem kartöflurnar eru settar í og svo þegar næsta rauf er gerð rótast yfir þá fyrri. Skóflan sem notuð er við þetta sést á myndinni.

Það var slátrað svíni hjá Matthild grannkonu okkar í síðustu viku og nú segist hún vera hætt svínaræktinni og þegar geiturnar sem hún er með núna eru orðnar fullvaxnar verður þeim slátrað og ekki fengnar aðrar í þeirra stað.
Matthild er orðin svo slæm í fótunum að hú treystir sér ekki lengur til að afla fóðurs fyrir þessa gripi og hugsa um þá.
Þetta er mikil breyting á hennar högum, því allan þeirra búskap hefur hún séð um að framleiða kjöt og grænmeti fyrir sitt heimili, en nú verður að fara út í búð og kaupa þessar afurðir.
Hún segist muni sakna þess að hafa ekki heimaræktað kjöt, því það sé öðruvísi bragð af kjötinu sem hún kaupi í búðinni, en það verði bara að hafa það, því nú ráði hún ekki lengur við þetta.

Sunnudagsferð

Veður: 1,5°/16° skýjað.

Þórunn átti uppástungu að sunnudagsferðinni í dag, að fara í gróðraarstöð sem er í rúmlega þrjátíu kílómetra fjarlægð héðan.
Það eru orðin nokkur ár síðan við komum í þessa stöð síðast, því það er komin mý og góð gróðrarstöð mun nær okkur en þessi er.
Þessi stöð sem við fórum í, í dag er mjög stór og úrval af blómum og trjám er þar mjög mikið.
Þar er líka mikið úrvala af garðhúsgögnum, skrautmunum. Blómsturpottum, verkfærum og bókstaflega öllu sem tengist garðinum.
Það var mjög margt um manninn þarna í dag og flestir fóru með eitt eða fleiri blóm með sér út.
Við bara skoðuðum, eða réttara er að segja að Þórunn hafi skoðað og ég hafi rölt með henni mér til ánægju, því það er hún sem þekkir blómin og sér almennileg hvað er á boðstólum.
N´st litum við svo inn í raftækja og húsgagnaverslun sem er skammt frá gróðrarstöðinni. Það er búið að stækka verslunina svo mikið síðan við vorum þar síðast og auka vöruúrvalið mjög mikið.
Fyrir nokkrum árum fórum við með Matthild og Manúel nágranna okkar í þessa verslun til að kaupa sér ísskáp, því ísskapurinn þeirra hafði geispað golunni.
Við vorum að reyna að ráðleggja þeim í sambandi við val á skáp, en þar kom fljótlega að Matthild sá skáp sem hana langaði til að kaupa, þó hann væri mun dýrari og að mörgu leiti óhentugur fyrir hana, en Manúel þekkti sína konu og sagði okkur að fyrst hún væri búin að bíta í sig að fá þennan skáp að þá yrði henni ekki haggað með það og það reyndist rétt hjá honum.
Skápurinn var keyptur, en verst var að hann entist illa, mótorinn í honum bilaði eftir örfá ár.

Nýtt ljós

Veður: 5,7°/18,2° þoka fyrst í morgunn, en síðar að mestu léttskýjað.

Nú er komið nýtt og fallegra ljós yfir eldhúsborðið hjá okkur, það leysir af hólmi plastljós sem hefur þjónað sínu hlutverki með prýði undanfarin ár. Það hefur skilað þeirri birtu sem til var ætlast af því, en var ekki augnayndi í leiðinni. Þórunn er víst nokkrum sinnum búin að minnast á að það væri gaman að fá fallegra ljós í eldhúsið, jú ég hef svo sem verið sama sinnis með það, en samt ekki eins áhugasamur og hún.
Eitthvað hefur henni verið farið að leiðast þófið, því fyrir jólin spurði hún hvort hún gæti bara ekki fengið eldhúsljósið í jólagjöf.
Slíkt fannst mér ekki koma til greina að fara að gefa henni í jólagjöf hlut sem nota ætti í íbúðarhúsinu, en þetta varð til þess að við fórum í alvöru að svipast um eftir nýju eldhúsljósi í búðarferðum okkar, en einhvern veginn var það svo að við sáum ekkert sem okkur fannst spennandi.
Það til í þessari viku að við litum inn í verslun sem nýlega er búið að opna í Aveiro, þar var ljós sem okkur leist báðum vel á og ákveðið var að kaupa.
Þegar átti að fara að pakka ljósinu inn kom Þórunn auga á að það var brotið og ekki til annað ljós alveg eins. Afgreiðslustúlkan bjóst við að fá annað ljós eftir einn eða tvo daga, svo við fórum á stúfana í dag til að athuga hvernig gengi. Það kom okkur ekki verulega á óvart að ljósið var ekki komið og nú voru engin ákveðin svör um hvort eða hvenær það kæmi.
Svo það varð úr að velja ljós með öðru munstri og nú er það komið á sinn stað yfir eldhúsborðinu og á vonandi eftir að varpa birtu á mismunandi kræsingar á borðinu um ókomin ár.

Þorri

Veður: 9,3°/20,7° þoka fyrst í morgunn, en léttskýjað eftir að þokunni létti.

Það er ekki hægt að kvarta undan veðrinu hér á fyrsta degi í Þorra, sól og blíðviðri.
Fyrsta sinn á þessu ári sem hitinn á hitamælinn hér komst yfir 20 gráðurnar.
Ég notaði góða veðrið til að slá grasfötina, en það var í fyrsta sinn á þessu ári sem hún er slegin, eftir sláttinn bar ég svo áburrð á blettinn til að fá fallegt og kröftugt gras og meiri vinnu við að slá.
Það er ekki vandamál ef maður verður svangur meðan á slætti stendur, þá þarf ekki annað en ná sér í appelsínu á trénu og afhýða hana og borða.
Appelsínurnar eru mjög góðar núnar og albest er að borða þær strax og þær hafa verið teknar af trénu.
Við erum búin að bjóða Portúgölskum vinum okkar í mat í kvöld, það verður ekki um neinn svokallaðann þorramat að ræða, enda á ég ekki von á að þau kynnu að meta slíkan mat.

Endurfundir

Veður: 1°/16,5° alskýjað.

Í morgunn klippti ég horteinsíurnar, ef einhver sér fyrir sér að ég hafi verið að dúlla við að klippa niður lítið stofublóm í potti, þá er það ekki rétt. Ég var með stórar rafmagnshekkklippur og veitti ekki af því hortensíurnar vaxa hér úti í garði og verða einn og hálfur metri á hæð, þó þær séu klipptar niður á hverju ári. Þetta eru ótrúlega duglegar og fallegar plöntur og það þarf nánast ekkert að hafa fyrir þeim.

Eftir matinn fórum við svo í góðan göngutúr í gegnum skóginn sem er hér við þorpið. Þau fáu tré sem fella laufið standa nakin núna og burkninn í skógarbotninum er allur dauður, en hann kemur fljótlega aftur um leið og hlýnar í verði. Á svona gönguferðum um skóginn er gaman að fylgjast með hvar verið er að fella tré og eins þar sem sér út á akra að fylgjast með hverju er verið að sá á mismunandi tíma.

Síðdegis fórum við svo að versla í bæ hérna innar í landinu og á bílastæðinu má eiginlega segja að ég hafi hitt gamlan og kæran kunningja, ef hægt er að segja svo um hluti úr málmi og gleri. Þarna á bílastæðinu var Citroen super árgerð 1973, en ég átti einmitt samskonar bíl og ég man enn hversu gott var að aka þessum bílum.
Hann hefur átt góða daga og fengið góða umönnun þessi bíll sem ég sá í dag, því hann leit út eins og hann væri nýr, því til sönnunar læt ég fylgja mynd sem ég tók af bílnum.

Annar í afmæli.

Veður: 11,5°/15,6° úrkoma 2 mm. Þurrt í dag en skýjað.

Það fór nú svo að ég hafði annan í afmæli í dag, því þó afmælismaturinn bragðaðist ágætlega í gær að þá hæfði hvorki umhverfið sem við borðuðum á né hvernig maturinn var borinn fram þeim kröfum sem ég geri til afmælisveislu.
Til að bæta úr þessu fórum við í dag á gott veitingahús í Aveiro og þar varð ég ekki fyrir vonbrigðum. Maturinn var frábær, þjónustan og umhverfið gott.
Við fengum grillað kalkúnakjöt með ananas og þessu var svo smekklega raðað á diskana og bragðið var eins og best verður á kosið. Í eftir rétt var svo ananas fromas, líka mjög gott.
Svona til að sanna mál mitt þá læt ég fylgja með myndir af matnum og hvernig hann var borinn fram. Ég þarf varla að taka það fram að maturinn í leirfatinu er maturinn sem við fengum í gær, en falllegi diskurinn er frá því í dag.

Ég sagði frá því í síðustu viku að við hefðum kvartað formlega hjá Toyota yfir þjónustunni sem við hefðum fengið þar. Þetta virðist hafa borið árangur, því nú eru allir á hjólum í kring um okkur.
DVD diskurinn með kortinu í GPS tækið kom fyrr en lofað var og það var hringt í okkur um leið og hann var tilbúinn til afgreiðslu, sem var í gærmorgun.
Þegar við vorum að taka á móti diskinum kom yfirmaður varahlutadeildarinnar og lét okkur vita að bókin yfir Gps tækið kæmi 25. janúar, við vonum að það standist.
Þjónustufulltrúinn hringdi svo í dag til að kanna hvort málin væru ekki í réttum farvegi.
Þessi nýja uppfærsla á vegakortinu í GPS tækið er mun fullkomnari en sú sem við höfðum. Í eldri útgáfunni var bara sýndur þjóðvegurinn í gegn um þorp eins og því sem við búum í, en nú er búið að færa inn hvern krákustíg og það sama gildir um aðra þá staði sem við höfum farið um eftir að við fengum nýja kortið.

Afmæli á ný, getur það bara verið rétt?

Veður: 5,3°/16,9° skýjað og úrkoma síðdegis, en svo lítið að það var vart mælanlegt.

Þó ég muni það ekki hef ég sjálfsagt einhvern tímann sagt ég er sextán og bráðum sautján, því það var mjög stór áfangi að ná sautján ára aldri, því þá var heimilt að taka bílpróf. Það var heldur ekki verið að bíða neitt með að taka bílprófið, það var tekið á sjálfan afmælisdaginn þegar ég varð seytján ára.
Nú er maður löngu hættur að segja að maður verði bráðum þetta og þetta gamall, en afmælisdagarnir skila sér samt og svei mér ef það er ekki verið eitthvað að svindla og farið að hafa árin styttri en áður var. Allavega finnst mér mjög stutt síðan ég átti afmæli síðast og nú á ég afmæli á ný í dag.
En gott og blessað að eldast á meðan heilsan er í lagi.
Afmælisdagurinn byrjaði ekki amalega, því hann byrjaði á því að Þórunn dekraði við mig með hátíðarmorgunverð með kertaljósum og öllu tilheyrandi.
Við vorum búin að ráðgera að fara og skoða borg sem heitir Pombal á afmælisdaginn minn ef verðið yrði gott og í morgunn var ágætisveður svo við lögðum bara í hann.
Þessi bær er í um það bil eitthundrað og tíu kílómetra héðan til suðurs og við höfum oft ekið þjóveginn í gegnum bæinn en ekki gefið okkur tíma til að skoða bæinn að gagni.
Við vorum komin þarna um hádegi, svo fyrsta verkið var að finna stað til að borða á. Ekki er hægt að segja að þetta hafi verið neinn glæsistaður, en það sem skiptir mestu máli, er að við fengum bragðgóðan mat þarna. Eitthvað sem nefna mætti uppá íslensku vorkálf. En þetta eru nautakjötsbitar steiktir í ofni ásamt kartöflum og grænmeti. Það er mjög víða boðið upp á svona mat hér, en oftar en ekki er búið að hafa kjötið svo lengi í ofninum að það er komið kæfubragð af því, en í dag var þetta alveg mátulega steikt.
Eftir matinn fórum við í góða gönguferð um bæinn, þetta er snyrtilegur bær með nokkrum gömlum og fallegum húsum og uppi á hæð yfir bænum tróna kastalarústir. Nú svo eru auðvitað ný hverfi með blokkum og einbýlishúsum eins og gengur.
Hampiðjan reisti verksmiðju í þessum bæ í samvinnu við Portúgali, ég veit ekki hvort verksmiðjan er enn starfandi.
Þegar við komum heim í Albergaria fengum við okkur afmæliskaffi, svo það er ekki hægt að segja annað en maginn hafi fengið sitt á þessum afmælisdegi, eins og raunar á flestum slíkum dögum.
Myndirnar eru frá Pombal.

Veður

Veður: 3,5°/14° skýjað

Veður

Veður: 0,7°/14,5° skýjað og fremur hráslagalegt.

Dagur "bóndakonunnar"

Veður: -0,3°/17,2° léttskýjað.

Í morgunn fór "bóndakonan" á markaðinn til að kaupa kálplöntur, púrrulauk og salatplöntur.

Hér er verið að koma plöntunum á sinn stað í garðinum.

Fyrsta rispan

Veður: 0,8°/19,9° heiðskýrt.

Það hefur víst ekki farið framhjá lesendum þessara pistla að við pöntuðum okkur nýjan bíl í lok águst og fengum bílinn afhentan þann 12. september.
Þessum góða bíl áttu að fylgja leiðarvísar á portúgölsku, tvær bækur önnur upp á fjögur hundruð síður en hin aðeins tvöhundruð síður.
Um leið og við gengum frá pöntuninni á bílnum báðum við um að fá leiðarvísana með bílnum á ensku. Okkur var sagt að það væri ekkert vandamál, tæki bara smátíma, bækurnar yrðu sendar með pósti um leið og þær væru komnar til þeirra.
Við fórum og spurðum eftir bókunum þegar okkur var farið að lengja verulega eftir að fá þær, okkur var sagt að þetta væri alveg að koma, bara bíða róleg.
Eftir tæpa tvo mánuði kom fyrri bókin, en enn er sú seinni ókomin eftir tæpa fimm mánuði.
Fyrir tæpum þrem vikum pöntuðu við svo nýtt kort í GPS tækið í bílnum. Því var lofað eftir fimm daga og eins og fyrr átti að hringja og láta okkur vita þegar við mættum sækja kortið. Þegar ekkert hafði heyrst eftir fjórtán daga fórum við á staðinn, en þá var svo léleg nettengingin hjá fyrirtækinu að okkur var sagt að það var ekki hægt að sjá hvað pöntuninni liði. Við hringjum í ykkur í fyrramálið og látum vita hvernig gengur. Auðvitað hringdi engin.
Nú fannst okkur ver nóg komið af lélegri þjónustu, svo við ákváðum að fara í dag og reyna að fá aeinhvern botn í þetta.
Sá sem sá um að panta kortið bar því við að svona lagað hefði aldrei verið pantað áður og þess vegna hefði eitthvað farið
úrskeiðis, en diskurinn yrði kominn eftir sex daga.
Næst fórum við svo í að athuga með bókina eina ferðina enn, en sem fyrr var enga bóka að hafa.
Nú var okkur nóg boðið og báðum um að fá að tala við manneskju sem sæi um þjónustu við viðskiptavini fyrirtækisins, eftir smánudd tókst það, þegar það þótti útséð um að það væri ekki hægt að tala okkur til og bara bíða og bíða.
Í öllum stærri fyrirtækjum og þjónustustofnunum hér í Portúgal liggur frammi kvörtunarbók, sem viðskiptavinirnir geta skrifað í sínar kvartanir ef þeir eru ekki sáttir við þjónustuna.
Svona bók var að finna í Toyotaumboðinu og þjónustufulltrúinn sýndi okkur stoltur að enn sem komið er hefði enginn skrifað kvörtun í þessa bók, það hefði alltaf tekist að gera viðskiptavininum til hæfis. Hún reyndi hvað hún gat til að hafa okkur ofan af því að skrifa kvörtun í bókina.
Við vitum öll hversu erfitt er að fá fyrstu rispuna, eða beygluna á nýja bílinn og það virtist vera álíka erfitt fyrir þjónustufulltrúann að horfa upp á að skrifað væri í fyrsta sinn í kvörtunarbókina, en nú er hann búinn að upplifa það.
Ég vona að þetta verði til þess að við og aðrir viðskiptavinir getum átt von á betri þjónustu þarna í framtíðinni.

Blómstrandi tré.

Veður: 0,5°/19,7° léttskýjað.

Í gær var ég að minnast á vorið og að það væri ýmislegt sem benti til að það væri að nálgast.
Þessu til sönnunar er myndin hér á síðunni af blómstrandi tré, en þessa mynd tók ég í morgunn.
Það virðist sem mímósan ætli að bíða aðeins lengur með að sýna sinn fallega gula lit, við fórum í rannsóknarferð í morgunn til að reyna að finna blómstrandi mímósu, en án árangurs.

Nú er búið að háþrýsti þvo alla stéttina meðfram húsinu með vélinni sem keypt var í gær, svo nú er hún tilbúin að taka á móti hækkandi sólþ
Það fór eins og ég átti von á Manúel granni okkar þáði gömlu þvottavélina með þökkum, þó hún væri farin að slappast dálítið. Gott ef hann getur garmast við hana.

Vorveður (sýnishorn)

Veður: 5,4°/19,1° léttskýjað.

Eins og sjá má á hámarkshitanum hér fyrir ofan var eiginlega smá sýnishorn af vordegi hér í dag. Það var léttskýjað og ýmist hægur andvari eða logn. Að sjálfsögðu notuðum við okkur góða veðrið og drukkum kaffið eftir hádegismatinn hér úti á veröndinni.
Að kaffidrykkjunni lokinni var farið í að háþrýsti þvo veröndina og ná burt mosanum sem hefur sest á milli steinanna í stéttinni meðfram húsinu. Það er engin leið að líða slík óhreinindi þegar sólin fer að hækka á lofti. Það er eins og maður geri meiri kröfur til þess að hafa snyrtilegt utan hús, í garðinum og annars staðar um leið og sól fer að hækka á lofti, það er svo sem eðlilegt, því þá er maður meira utan dyra, en á meðan kaldast er í verði.
Það kom í ljós að háþrýstiþvottavélin var orðin ansi kraftlítil, enda ekki að undra því ef ég man rétt er hún orðin tíu ára og búin að hreinsa burt mikið af óhreinindum á þeim tíma.
Síðdegis fórum við á stúfana til að kaupa nýja þvottavél, við ætluðum bara að kanna hvað væri í boði af slíkum tækjum, en það endaði með því að við keyptum eitt slíkt tæki og nú er bara eftir að sjá hvernig það reynist.
Ég á von á að ég bjóði Manúel granna mínum gömlu vélina, hann hefur alltaf þegið með þökkum öll tæki sem mér finnast ekki lengur vera nógu góð. Það er hið besta mál ef hann sættir sig við að nota þessi tæki, mun betra en að þurfa að henda þeim beint í ruslið.
Þó það hafi verið hlýtt og notalegt hér í dag, þá á hitinn örugglega eftir að hoppa upp og niður á næstunni, áður en vorið nær endanlega fótfestu og hitastigið verður stöðugt.

Veður

Veður: 5,1°/15,5° úrkomulaust. Dálítið skýjað, en sólarstundir.

Verðlag.

Veður: hiti 8,7°/13,7° úrkoma 2mm. Alskýjað og smáskúrir.

Flestir Íslendingar sem hingað hafa komið eru sammála um að verðlag hér sé mun lægra en á Íslandi, en svo er einstaka manneskja sem reynir að telja manni trú um að verðlag á Íslandi hafi lækkað og margt sé bara eins dýrt hér í Portúgal og á Íslandi. Það er gott ef fólk er sátt við verðlagið í sínu heimalandi og sjálfur er ég mjög sáttur við verðlagið hér í Portúgal, en aftur á móti hnykkir mér illa við þegar ég er á Íslandi og þarf að kaupa eitthvað matarkins þar, því mér finnst verðið vera alveg himinhátt.
Frétt sem ég sá í Mogganum í dag og fer hér á eftir staðfestir svo ekki fer á milli mála verðmun á Íslandi og í Portúgal.

Verð á vörum og þjónustu 46% hærra hér að jafnaði en í ESB
Verð á vörum og þjónustu sem venjuleg heimili nýta sér var að jafnaði 46% hærra á Íslandi en var að jafnaði í „gömlu" Evrópusambandslöndunum 15 árið 2005, að því er kemur fram í samantekt dönsku hagstofunnar. Verð á mat- og drykkjarvörum var 62% hærra hér á landi en að jafnaði í ríkjunum 15.
Danska hagstofan segir, að af umræddum 15 ríkjum sé hafi hæsta verðið verið í Danmörku, eða 33% að jafnaði yfir meðaltal en þar á eftir í Írlandi, 19%. Lægst var verðið í Portúgal og Grikklandi þar sem verðið var 17% og 16% undir meðaltalinu.
Eftir stækkun Evrópusambandsins í 27 ríki er verðlagið lægst í Búlgaríu og Rúmeníu, sem gengu í ESB nú um áramótin.
Ef verð á allri vöru og þjónustu, líka á opinberum innkaupum og fjárfestingum, er reiknað út, er það 38% hærra á Íslandi en að meðaltali í gömlu ESB-ríkjunum 15, að sögn dönsku hagstofunnar.

Veður

Veður: 9,4°/15,8° úrkoma, en vart mælanleg.
Skýjað og smáskúr síðdegis.

Aldarminning

Veður: 3°/17,9° léttskýjað.

Í dag eru eitt hundrað ár frá fæðingu móður minnar, en hún náði níutíu of sjöára aldri.
Ég er svo lánsamur að vera í hópi þeirra mörgu sem hafa verið svo heppnir að eiga bestu Móðir í heimi. Hún gaf mér svo ríkulegt veganesti út í lífið að það endist mér enn þann dag í dag og það á örugglega eftir að duga mér þá´daga sem ég á enn eftir að lifa. Það er svo gott með svona nesti sem sáð er í sálu manns að það tekur lítið pláss og alltaf hægt að grípa til þegar á þarf að halda.

Góður dagur

Veður: 7,9°/18,6° úrkoma 2mm. Þoka fyrst í morgunn, en frá hádegi að mestu léttskýjað.

Gott að vera komin á ról eftir kvefið, þó það sé ekki alveg búið að sleppa tökum á mér, en ég er á góðri leið með að hrista það af mér.
Við byrjuðum daginn á leikfimi eins og vera ber á föstudegi, það var vel unnið í þessum leikfimitíma og þar af leiðandi lítið spjallað. Oft er svo mikið sem þær þurfa að spjalla saman blessaðar að þær hafa varla tíma til að gera æfingarnar sínar, bara verst fyrir þær sjálfar.

Eftir hádegi tók ég dæluna upp úr brunninum, því slangan sem liggur frá dælunni var farin að leka, samt er hún nærri ný. Þetta er búið að vera bilað í nokkra daga, en vegna kvefsins treysti ég mér ekki til að eiga við þetta fyrr en í dag. Það gekk vel að gera við, svo nú erum við farin að nota vatn úr brunninum á ný, en við þurftum að nota vatn frá vatnsveitunni á meðan þetta var bilað.
Bíllinn fékk líka sitt þrifabað.
Þórunn notaði góða veðrið til að vinna í garðinum, við að snyrta og færa til plöntur.

Veður.

Veður: 1,4°/13,7° þokuloft.

Kvef og góð ráð.

Veður: -0,8°/17,5° léttskýjað.

Ég er búinn að vera með leiðindakvef í eina viku en finnst ég loks vera að byrja að hressast.
Ekki vantar að ég er búin að fá ýmiss góð ráð um hvernig maður fer að því að ná skjótum bata, en ég hef eins og áður kosið að hundsa öll slík ráð og látið tímann um að laga þetta.
Númer eitt á listanum yfir ráð sem ég hef fengið, er að drífa sig strax til læknis og fá einhver lyf, en þar sem ég hef ekki heyrt um neitt lyf sem læknar kvef hef ég ekki talað við lækni.
Nú þar næst er að drekka heitt te með hunangi og það hef ég gert, því mér finnst það aðeins mýkja hálsinn smástund á eftir.
Annað sem á að vera alveg óbrigðult ráð, er að skera gulrætur í sneiðar, setja þær í skál ásamt slatta af púðursykri. Þegar þú svo drekkur sykurleðjuna af þessu er kvefið fljótt að hypja sig úr kroppnum á þér.
Ekki má gleyma því gamla húsráði að fá sér sterkan drykk.
Að lokum læt ég fljóta með það fáránlegasta ráð sem ég hef nokurn tíman heyrt um til að forðast að kvef nái að búa um sig í manni. Þetta ráð verður sem sé að nota strax um leið g þú hefur grun um að þú sér að veikjast af kvefi.
Á salernum hér í landi eru tvær skálar, önnur er til að setja í þann úrgang sem líkaminn þarf að losna við, en hina á að nota til að þrifa sig á eftir.
Þessa síðarnefndu skál á að fylla af ísköldu vatni og skella svo berum bossanum á sér þar ofan í og þar með er alveg pottþétt að kvefið sem var að ná tökum á þér er á bak og burt. Ég reyndi að fá útskíringu á hvernig þetta gæti orðið til þess að maður kvefaðist ekki, en það var fátt um svör, en sú sem gaf þetta ráð sagðist hafa sannreynt þetta á sjálfri sér og gefist vel.
Svo er nú það, eins og sjá má af ofansögðu eru til mörg óbrigðul ráð til að losna við kvef, en vegna óráðþægni og meðfæddrar þrjósku er ég búinn að þjást af þessu fjára í viku

Veður

Veður: 0,9°/17,3° léttskýjað

Gleðilegt ár.

Veður: 8,4°/15,9° úrkoma 5mm. Þoka eða þokusúld fram að síðdegiskaffi, en þá létti til..

Ég óska öllum farsældar á þessu ári sem nú er að hefja siía göngu inn í óráðna framtíð.

Ég átti eftir að gera grein fyrir síðustu stundum síðasta árs og best að ljúka við það áður en farið er að setja á prent atburði nýja ársins.
Mathild grannkona okkar var búin að orða það við okkur að við borðuðum með þeim hjónum síðustu kvöldmáltíð ársins, en átti eftir að tímasetja nákvæmlega klukkan hvað við ættum að mæta í matinn. Ég var nú raunar í vafa um hvort ég ætti að fara til þeirra því ég var svo kvefaður og vildi ekki vera að smita þau af kvefinu. Þegar svo Mathild kom hér yfir var hún líka kvefuð, svo ég þurfti ekki að hafa áhyggjur af að bera kvefið í hana.
Þegar við komum yfir til þeirra var hún enn að fást við matreiðsluna í sínu útieldhúsi, en var búin að leggja fínt á borð fyrir okkur í eldhúsinu og þar skíðlogaði í arni, svo það var notalegt þar inni.
Manúel vildi drífa í mig Wiksky til að ná úr mér kvefinu, þegar ég vildi ekki þiggja það bauð hann mér Martini, en ég afþakkaði það líka, svo ég get víst sjálfsagt sjálfum mér um kennt að vera enn þjáður af kvefi.
Manúel veit fullvel að við drekkum mjög lítið vín, en samt opnaði hann bæði hvítvíns og rauðvínsflösku, ég hef hann sterklega grunaðan um að gera þetta í eiginhagsmunaskini. Því hann gerir veigunum mjög góð skil.
Matthild var búin að steikja handa okkur svínakjöt, sem var mjög ljúffengt hjá henni, með þessu bar hún fram heimabakað brauð, soðin grjón, steiktar kartöflur og úr dós komu gulrætur og grænar baunir.
Í eftirrétt var hún svo með kökur og í þetta sinn reyndi hún ekki að troða endalaust í mig mat, hún tók alveg tillit til þess að ég var fremur listarlítill.
Að sjálfsögðu var sjónvarpið opið allan tímann sem verið var að borða, það hvarflar ekki að nokkrum manni hér í landi að slökkva á sjónvarpinu, þó það séu gestir.
Það var byrjað einhvers konar áramótaskaup í sjónvarpinu áður en við fórum og helst var það fundið stjórnandanum til vansa, en það var víst íturvaxin stúlka að hún beraði of mikið af brjóstum sínum. Eftir því sem Mathild sagði er allt í lagi að gera slíkt undir fjögur augu inni í svefnherbergi og sömuleiðis á ströndinni, en fyrir framan alþjóð i sjónvarpi nei takk. Manúel tók undir þetta með sinni konu, en eitthvað fannst mér vanta upp á sannfæringarkraftinn hjá honum.
Sjónvarpið þeirra er svo lítið að ég sé eiginlega ekkert af því sem þar fer fram svo ég gat ekki tekið þátt í þessum samræðum.
Þetta var semsagt indælt áramótakvöld sem við áttum með nágrönnum okkar.

Fyrsti dagur ársins heilsaði svo með þokulofti og rigningarsudda, en mildu veðri.
Við ákváðum að láta á það reyna hvort við fyndum opin matsölustað og láta eldamennsku lönd og leið.
Það reyndist auðveldara en við áttum vona, því staðurinn sem við komum fyrst að reyndist opinn, við höfum nokkrum sinnum borðað þarna og alltaf fengið góðan mat og þjónustan er mjög góð.
Ekki var heldur verið að okra neitt á okkur þó það væri nýársdagur. Fyrir góða steik og ábæti greiddum við 2400 Kr. fyrir okkur bæði.
Þetta er í fyrsta sinn sem ég fer út að borða um áramót og ég á alveg eins von á að það verði endurtekið einhvern tímann síðar, því þetta var góð tilbreyting.