Veður: 13,9°/20,4° úrkoma 5 mm. Alskýjað til hádegis, en þá fór að birta og síðdegis sá til sólar af og til

Þórunn er búin að vera með slæma hálsbólgu síðan á fimmtudag, en virðist nú vera að komast á þann góða veg sem kallaður er batavegur. Hún hefur alveg sloppið við að fá þessar umgangspestir sem hafa verið að hrjá mig í vetur, en nú er röðin komin að henni. Það er kostur að geta skipst á vöktum í þessu, það væri verra ef við værum bæði lasin á sama tíma.

Við slepptum að fara í leikfimi á föstudag vegna veikindanna, en ég hjólaði þess í stað, sem var síst verra.

Ég hef svolítið verið að vinna í garðinum síðustu daga og eins og sjá má á meðfylgjandi mynd er margt þar sem gleður augað þessa dagana.

Veður

1. mars. Veður 6,3°/21,1° léttskýjað.
2. Mars. Veður: 11,1°/19,2° alskýjað og rigning undir kvöldið.

Tilraun

Ég hef ekki komist inn á heimasíðuna mína í aðaltölvunni síðustu daga og n´geri ég tilraun með hvort mér tekst að skrifa inn á síðuna í fartölvunni.

Veður

Veður: 2,1°/17,3° skýjað.

Þessi túlípani á heimili sitt hér við húsvegginn hjá okkur.

Kartöflugrös

Þetta er mynd sem ég tók af kartöfugrösunum í garðinum okkar í gær.
Ég er að reyna að finna þægilegri aðferð til að koma myndum með textanum, svo ég leyfi kartöflugrösunum bara að halda för sinni áfram um netið fyrst þau eru lögð af stað.

Plantað lauk

Þessi mynd af Þórunni við að planta út lauknum átti að vera með pistlinum í gær, en þá var eitthvert ólag á bloginu svo mér tókst ekki að fá það til að taka við myndinni þrátt fyrir ítrekaðar tilraunir.

Vona að þetta takist núna.

Að leika bændur

Veður: 1,5°/19,3° Léettskýjað.

Við notuðum góða veðrið í dag til að vera í bændaleik.
Laukurinn sem Þórunn sáði í haust er orðinn það stór að okkur fannst orðið tímabært að planta honum út. Raunar vorum við ekki með það alveg á hreinu hvort það væri alveg rétt tungl til að planta lauk, en hér er ekki talið ráðlegt að plamta lauknum nema á minnkandi tungli. Ef lauk er plantað á vaxandi tungli, verður það til þess að hann geimist illa og spírar fljótt, segja grannkonur okkar.
Þessu er aftur á móti þveröfugt farið með baunir, þeim á að sá fyrir á vaxandi tungli, því þær eiga víst að teigja sig upp í loftið.
Það vantar ekkert upp á hljómkviðu sveitaþorpsins þegar verið er að vinna í garðinum. Fyrst ber að telja hanana sem ekki láta sitt eftir liggja og þar næst koma hundarnir, sem láta í sér heyra með stuttu millibili. Það fer ekki framhjá okkur hvenær pósturinn er á ferðinni, því þá ærast hundar nágrannans. Það er alveg makalaust hvað hundum er uppsigað við póstinn og alveg ákveðnir í að taka hann ekki í sátt, þó hann komi á hverjum virkum degi.
Í dag heyrðum við létt mal í sláttuorfi nágrannans þegar hann var að slá gras í gripina sína og nokkra stund heyrðist þunglamalegt hljóð í dráttarvél sem var að plægja akur.
Svo eru líka léttari og ljúfari tónar frá smáfuglunum, sérstaklega undir kvöld þegar þeir koma heim í sitt tré og setjast á sína grein og taka til við að segja nágranna sínum á næstu grein frá viðburðum dagsins.

Sumarblóm

Veður: 1,1°/19,2° úrkoma 7 mm. Þurrt í dag og léttskýjað síðdegis.

Sunnudagsbíltúrinn notuðum við meðal annars til að skoða nýja verslun, sem er nýlega búið að opna í bæ hér skammt fyrir norðan okkur.
Þetta eru eiginlega þrjár einingar. Í einni einingunni eru byggingavörur og verkfæri og flest það sem þarf til endurnýjunar, eða nýbyggingar á íbúðarhúsnæði. Í miðjunni er svo venjulegur stórmarkaður og sérbúðir ásamt veitingastað og bakaríi. Að lokum er svo deild fyrir þarfasta þjóninn og þar á ég að sjálfsögðu við bílinn. Þarna er bílavörubúð, þvottastöð og ýmiss þjónusta við bíla.
Þegar haft er í huga hvað laun eru lág hér í landi er ótrúlegt að það skuli vera grundvöllur fyrir rekstri allra þessara nýju verslana.
Á heimleiðinni litum við inn í blómavalið okkar til að kaupa sumarblóm og á orgunn er meiningin að planta þeim hér í garðinum.
Það er ekki seinna vænna áður en sumarið kemur.

Fluttningar

Veður: 10,7°/19,8° úrkoma 2mm. Að mestu skýjað í dag og ein smáskúr.

Í dag tókst að leysa síðasta vandamálið við að skipta yfir í Vista stýrikerfið.
Það er búið að vera vandamál með þráðlausu tenginguna á tölvunni hennar Þórunnar, en nú er búið að tengja tölvuna við netið með kapli og þar með virðist allt vinna eðlilega.
Tölvumaðurinn var hér í dag til að ljúka þessu af, hann ætlaði nú að vera hér í gærkvöldi, en kom klukkan fjögur í dag.
Að skipta um stýrikerfi er dálítið eins og að flytja í aðra íbúð, það þarf að pakka ýmsu niður áður en flutt er og enn er eftir að taka upp úr nokkrum kössum. Það er með þennan flutning eins og að flytja búslóð maður notat tækifærið og hendir ýmsu dóti sem ekki hefur verið notað lengi og ekki er neinar líkur á að verði nokkurn tímann notað.

Veður

Veður: 10°/16,8° úrkoma 7 mm. að mestu þurrt í dag.

Krónu virði

Veður: 10,4°/17,9° úrkoma 15 mm. Rigndi í gærkvöldi og nót og aftur í kvöld, en þurrt í dag.

Nú er ég einnar krónum meira virði en í gær, því ég fór til tann´æknisins í morgunn og hann lauk við að setja krónuna sem hann var að smíða fyrir mig á sinn stað. Á morgunn á mér að vera óhætt að tyggja hvað sem er, en í dag ráðlagði hann mér að hlífa krónunni.

Lág laun.

Veður: 0°/18,6° léttskýjað í dag, en þikknaði upp með kvöldinu.

Í gærkvöldi vorum við boðin í mat til Patriciu og Rui, að vanda fengum við góðan mat hjá þeim og áttum mjög góða kvöldstund með þeim, því þau eru bæði einstaklega þægileg og elskuleg.
Þar sem Patricia fæst við fasteignasölu og við vorum að tala um barneignir hér í Portúgal og hvers vegna hjón ættu almennt bara eitt barn. Hún vildi meina að fólk hefði hreinlega ekki efni á að eignast nema eitt barn og því til staðfestingar sagði hún okkur sögu af hjónum sem eru komin með þrjú börn.
Hjónunum langaði til að eignast eigin íbúð, en bankinn sagði að þau hefðu engin tök á að greiða af íbúð, sem var alveg rétt. Konan hafði 500 evrur í mánaðarlaun og bóndinn 600 evrur. Samtals höfðu þau því 1100 + 100 í barnab´tur, eða samtals 1200 evrur á mánuði = 117000 Kr.
Það gefur auga leið að það er ekki mikið eftir afgangs til húsakaupa þegar búið er að fæða og klæða fimm manna fjölskyldu af þessum lágu launum.Vinnulaun eru alveg ótrúlega lág hér í landi og Patricia vildi meina að þessi hjón væru með meðaltekjur.
Íbúð fyrir svona fjölskyldu kostar öðru hvoru megin við 100þús. evrur.
Það er ekki að undra þó fólk hér sé nýtið og horfi í hvern eyri sem það lætur frá sér.

Ég hjólaði hér inn Vougadalinn í dag og nú er mímósan farin að opna sín fallega gulu blóm. Það er mikið af mímósu meðfram þessum vegi og ilmurinn af henni er alveg frábær.
Ég læt fylgja með eina mynd af mímósu sem ég tók í dag.

Veður

Veður: - 1,2°/15,2 úrkoma 10 mm. Smáskúrir, en bjart á milli.
Veðrið í dag var ekki alveg nógu hagstætt fyrir skrúðgöngur, sem tenjast kjötkveðjuhátíðinni, því það var fremur svalt og einstaka skúrir.

Garðvinna

Veður: 2,7°/16,1 úrkoma 3 mm. rigningarskúr í morgunn, en síðan þurtt fram að kaffi, en þá byrjaði að rigna.

Sló grasflötina í dag og reitti talsvert af illgresi.
Nú eru rósirnar að laufgast, sem segir manni að það sé ekki orðið svo langt að bíða vorsins.

Tölvumaðurinn var hér í fjóra tíma að lagfæra tölvurnar hjá okkur og vonandi erum við þar með komin yfir erfiðasta hjallan í sambandi við að skipta um stýrikerfi í tölvunum.
Ég hringdi í morgunn til Friðriks Skúlasonar sem framleiðir leiðréttingarforritið púka. Þar fékk ég að vita að það verður ekki fyrr en í apríllok sem þeir eiga forrit sem vinnur með Windows vista, svo ég verð að biðja lesendur mína að sýna mér umburðarlyndi þó það séu stafsetningarvillur í þessum pistlum.

Konudagurinn

Veður: 3,3°/18,2° léttskýjað.

Í dag er mikið um hátíðarhöld hér í landi í sambandi við kjötkveðjuhátíðina. Í mörgum bæjum eru skrúðgöngur bæði í dag og svo aftur á sjálfan kjötkveðjudaginn, sem er á þriðjudag.
Við héldum daginn hátíðlegan með því að fara út að borða, en það var nú frekar í tilefni konudagssins, sem við héldumupp á daginn.
Auðvitað voru keypt konudagsblóm eins og vera ber fyrir þennan dag.
Við fórum á veitingahús í Albergaria, sem við höfum ekki komið á nokkuð lengi og þá kom í ljós að í salnum sem við vorum vön að vera er búið að breyta í brasilískan stað, en á efri hæðinni er venjulegur veitingastaður.
Þessi brasilíski staður er að hluta til hlaðborð. Í hlaðborðinu eru nokkrir smáréttir og grænmeti, en svo er líka boðið upp á þrettán tegundir af kjötmeti, sem þjónarnir koma með á spjótum og skera niður á diskana. Maður ræður hvaða kjöt er tekið og hverju er hafnað og eins hversu mikið er tekið af hverri tegund.
Það var líka boðið upp á grillaðan ananas og banana.
Það var gaman að reyna hvernig þetta bragðaðist og reyna eitthvað nýtt. Maturinn var allur bragðgóður, en samt held ég að við látum nokkurn tíma líða þar til við förum þarna aftur.
Fyrst ætlum við að skoða veitingasalinn á efri hæðinni, þar höfum við ekki komið inn áður.

Tölva.

Veður: 4,6°/17,9° að mestu þurrt í dag. Það er búin að vera nokkur úrkoma síðustu daga og meira að segja var þrumuveður einn daginn.

Ég hef ekki getað skrifað dagbók síðustu daga vegna smá tölvuævintýris.
Eins og flestir vita var Microsoft að koma með nýtt stýrikerfi á markað, sem heitir Windows vista og auðvitað gat ég ekki beðið með að fá mér eitt slíkt í tölvuna, þrátt fyrir aðvaranir um að það væri nú rétt að bíða í eitt ár og sjá hvernig kerfið reyndist.
Mín rök fyrir að fara út í þetta núna strax, eru þau að í dag sé ég nægilega vel til að geta notað tölvuna og lært á þetta nýja kerfi, en ég hef enga tryggingu fyrir að hafa sömu getu í framtíðinni.
Mér finnst líka gaman að takast á við nýja hluti og reyna eitthvað nýtt.
Það tók svona langan tíma að koma þessu í kring, því það voru vandamál í sambandi við stækkunarforritið og talgervilinn sem ég þarf að nota við tölvuna.
Án þessa búnaðar get ég alls ekki notað tölvuna, ég verð að láta talgervilinn lesa allt fyrir mig sem er á skjánum. Því létti mér ekki lítið í morgunn þegar ég var búinn að setja inn forritið fyrir íslenskuna og það virkaði, en það var engin trygging fyrir að það virkaði með þessu nýja stýrikerfi.
Hins vegar virkar leiðréttingarforritið sem ég átti ekki, svo það er mjög líklegt að það verði talsvert af stafsetningarvillum í þessum skrifum, þar sem ég verð mest að treysta því að heyra ef ég slæ inn rangan staf, en ég veit að slíkt verður fyrirgefið.

Þórunn fór á fimmtudag á eins konar grímuball með leikfimisystkynum okkar. Þar voru samankomnir nokkrir slíkir hópar úr bæjunum hér í nágrenninu. Samkoman var haldin í diskóteki hér í nágrenninu. Mér finnst svo óþægilegur hávaðinn á slíkum stöðum að ég kaus frekar að vera heima.

Valentínusardagur

Veður: 5°/20,2° úrkoma 6 mm. Rigndi í nótt, en léttskýjað í dag.

Eins og allir vita var dagurinn hans Valentínusar í dag, það er ekki orðin minnsta hætta áað maður gleymi þessum degi, það er svo rækilega minnt á hann í öllum fjölmiðlum.
Við borðuðum úti í tilefni dagsins um leið og við fórum að versla.

Síðdegis var svo mæting hjá tannlækninum til að máta krónuna sem hann er að smíða fyrir mig. Hann var sáttur við árangurinn og nú er mæting á fimmtudag í næstu viku til að ljúka þessu af.

Veður

Veður: 3,8°/16° úrkoma 6 mm. Rigningarúði af og til í dag.

Draugagangur

Veður: 7,1°/18,8° úrkoma 30 mm. Rigning í gærkvöldi og nótt, en að mestu léttskýjað í dag.

Klukkan að ganga fimm í nótt vaknaði ég við tólist úr útvarpsvekjaraklukkunni sem er við höfðalagið hjá mér. Þetta er í fyrsta sinn sem hún kveikir á útvarpinu svona óumbeðið, svo þetta kom mér verulega á óvart. Ég reyndi að þagga niður í henni en það tókst ekki, svo ég fór að skoða hana nánar og sá þá að það vantaði tölustafina á skjáinn. Nú reyndi ég að kveikja ljós til að komast að því hverskonar draugagangur þetta væri, en þá kom bara örlítil týra á peruna. Það var semsagt svona mikið spennufall á rafkerfinu sem hafði komið útvarpinu af stað. Ég rauk framúr til að taka úr sambandi þau rafmagnstæki sem voru tengd, svo þau eyðilegðust ekki, en þegar ég var búinn að því mundi ég eftir að dælan í brunninum gæti farið í gang, en þar sem það var rigning langaði mig ekkert til að fara út, svo ég brá á það ráð að slökkva á höfuðrofanum hér inni í töflunni. Eftir þessar aðgerðir sofnuðum við aftur og klukkan átta að gætti ég hvort rafmagnið væri komið í lag, en þá voru enn sömu týrurnar og um nóttina, en hálftíma seinna komst þetta í lag..Það skemmdust engin tæki hjá okkur, hvort það er vekjaraklukkunni og næturbröltinu á mér að þakka veit ég ekki.
Annars höfum við það fyrir sið hér að taka strauminn af tölvunum og tækjum sem eru tengd þeim, ásamt sjónvarpinu um nætur.

Matargestir

Veður 10-02. 9,1°/18,2° úrkoma 5 mm. Rigning síðastliðna nótt, en þurrt fram eftir degi.
Veður í dag 11-02 14,1°16,5 úrkoma 27 mm. Rigning í allan dag.

Eins og sjá má á veðrinu hér fyrir ofan er þetta búinn að vera innidagur í dag, bæði er að við áttum ekkert sérstakt erindi frá bæ og svo er það ekki svo oft sem rignir hér allan daginn að það er hægt að leifa sér að bíða betra veðurs.
Ég krækti mér líka í kvef, svo það er eins gott að taka því rólega, ég var rétt að ná því að jafna mig eftir kvefið sem ég fékk um jólin og nú er ég kominn með kvef aftur, þetta er nú einum of mikið af því góða.

Dóttur sonur minn hann Ingólfur Páll er fimmtán ára í dag. Það hefði verið gaman að geta heimsótt hann, en ég varð að láta duga að tala við hann í síma.

Við buðum Portúgölskum vinum okkar í mat í gærkvöldi. Það eru hjón og tvðr dætur þeirra, sú yngri er sextán en sú eldri er 24ár. Sú eldri er að ljúka námi í blaðamennsku, en sú yngri hefur mikinn áhuga fyrir matargerð og er jafnvel að spá í eitthvert nám tengt matargerð.
Mamman er kennari, en Pabbinn vinnur við fyrirtæki sem þau eiga og framleiðir franskar. Hann sér um að aka vörunum út, ásamt að sjá um reksturinn með eiginkonunni.
Þau kunnu vel að meta matreiðsluna hjá Þórunni. Fyrst fengu þau grænmetissúpu og síðan ofnsteikta kalkúnabringu með tilheyrandi grænmeti og í eftirrétt var svo ostakaka.
Eftir matinn var svo sest og spjallað saman og það gekk bara vel því þær mæðgur tala ensku, svo þetta var svona blanda af portúgölsku og ensku.

Veður

Veður: 4,1°/18,1° úrkoma 5 mm. Rigndi í gærkvöldi og aftur undir kvöld í dag, þurrt en skýjað í dag.

Misskilningur

Veður: 10°/19,2° úrkoma 27 mm. Rigning í nótt og framundir hádegi bjart um miðjan daginn, en rigning aftur í kvöld.

Það var hringt í mig frá tannlækninum í fyrradag og spurt hvort ég gæti mætt hjá honum í dag, jú það var ekkert vandamál fyrir mig að mæta í dag.
Ég var heldur betur ánægður með minn mann, því ég átti pantaðan tíma hjá honum á miðvikudag í næstu viku, hélt að nú ætlaði hann að flýta þessu.
þegar ég var búinn að heilsa í dag byrjaði ég á að þakka honum fyrir að vera svona snöggur að afgreiða krónuna á tönnina.
Mér hefði verið óhætt að sleppa þakklætinu, því það kom í ljós að ég var beðinn um að koma vegna þess að það mistókst eitthvað að taka mót af tönninni sem átti að setja krónuna á.
Svo fyrri áætlun er óbreitt að það á að máta krónuna næsta miðvikudag.
Svona fór nú með sjóferð þá.

Heimur batnandi fer.

Veður: 7,4°/14° úrkoma 10 mm. Byrjaði að rigna um hádegið.

Það hefur skapast sú hefð hér á bæ að gera sér aðeins dagamun þegar við fáum útborgað. Réttara er að segja þegar við yfirfærum peninga hingað frá Íslandi, en það gerist venjulega á þriggja mánaða fresti.
Áður þurfti að hafa samband við bankann á Íslandi og láta þá sjá um þetta, en nú sér Þórunn um að yfirfæra þetta með því að fara í tölvuna hér heima.
Þetta er ótrúleg framför frá því sem áður var og ég tala nú ekki um þegar helst var ekki hægt að fá gjaldeyri nema á svörtum markaði.
Svo segja sumir oft að heimurinn fari versnandi og það gerist því miður á sumum sviðum, en við megum ekki gleyma að taka eftir því sem breytist til betri vegar.
Bíðum nú við var ég ekki að tala um að gera sér dagamun, það gerum við með því að fara á kaffihús, eða út að borða og í dag vorum við í flottari kantinum og fórum út að borða.

Annríki

Veður: - 0,5°/16,7° léttskýjað fyrst í morgunn, en alskýjað síðdegis.

Við höfum átt annríkt í dag við að gera ekki neitt, það er merkilegt hvað það getur verið mikið að gera í slíkri vinnu.
Dagurinn byrjaði á þessu venjulega að fá sér morgunhressingu og líta síðan í blöð á netinu, þegar þessum verkefnum var lokið var klukkan farin að ganga ellefu.
Næsta verkefni var að fara til Aveiro og líta í dótabúðina, en þá er verið að tala um tölvubúð. Við erum að spá í að fá okkur Windows vista stýrikerfið og jafnvel að endurnýja aðra tölvuna um leið. Það var sem sagt lagt upp í leiðangur til að athuga hvað væri á boðstólum af tölvum og forritum.
Það vantaði ekki að það fyrsta sem blasti við augum þegar komið var inn í dótabúðina var tölva með Vista stýrikerfinu, en sá hængur er á því að það er á portúgölsku, en við viljum fá það á ensku.
Við töluðum við afgreiðslumann þarna sem er að athuga með hvort það er einhver möguleiki á að við getum fengið stýrikerfi á ensku án þess að þurfa að borga aukalega fyrir það.
Við fórum í aðra tölvubúð þarna skammt frá en þar voru engar tölvur til með nýja stýrikerfinu, en talið að hægt væri að fá uppfærslu í nýtt stýrikerfi ef það væri gert fyrir miðjan mars.
Það virðist sem það sé fremur erfitt að fá uppfylltar sérþarfir í þessum efnum.
Þegar þessum athugunum var lokið var komin matartími og ákveðið að fara og fá sér eitthvað heilsusamlegt að borða.
Hvað kemur þá fyrst upp í hugann annað en að fara á McDonalds, það gerðum við að minnsta kosti.
Þar fengum við salatdisk með kjúklingakjöti, ristuðu hvítlauksbrauði og jógúrt sósu út á.
Þetta var eiginlega einum of heilsusamlegt, svo við þorðum ekki annað en að fá okkur ís á eftir með heitri sósu.
Ég læt fylgja með mynd af salatdiskinum til að sanna mál mitt, en sleppi að setja mynd af ísnum.
Eftir matinn komum við í matvörubúð á leiðinni heim.
Næst lá leiðin til tölvumannsins okkar til að athuga hvort hann gæti útvegað okkur tölvu og tilheyrandi forrit. Hann tók vel í að kanna málið og lofar að koma með verðtilboð til okkar á morgunn.
Það er spennandi að sjá hvað hann hefur að bjóða.
Næsta verkefni var að fara og sækja niðurstöðuna úr blóðrannsókninni hjá mér, því miður virðist hafa sigið örlýtið á verri veg, en ekki alvarlega held ég með kólesterólið. Ég á að hitta lækninn á föstudag og hann leggur þá sinn dóm á þessa niðurstöðu.
Þegar öllu þessu var lokið var kominn kaffitími og eiginlegum vinnudegi okkar lokið, bara eftir að dingla sér svolítið í tölvunni.
Það hljóta allir að vera mér sammála um að það er mikil vinna að gera ekki neitt nema leika sér alla daga.

sís>x

Veður: 1°/17,4° léttskýjað.

Ég átti stefnumót við tannlækninn minn í morgunn, því fyrir rúmri viku datt fylling úr jaxli hjá mér. Það var nú raunar meira en fylling, því það er nær að segja að það hafi farið alveg glerungurinn innan af tönninni.
Það fór eins og mig grunaði að eina ráðið til að lappa upp á þennan jaxl væri að setja krónu á hann.
Það eru nú frekar erfið tjáskiptin hjá mér og tannlækninum, því hann talar álíka mikið í ensku og ég í portúgölsku.
Það vafðist dálítið fyrir mér að skilja hvað hann meinti þegar hann fór að tönnlast á sís rís hvað eftir annað og benti á einhvern kassa upp á vegg.
Að lokum rann upp ljós fyrir mér hann var að tala um xrays, en hér er sagt sís fyrir stafinn x. Það þurfti sem sé að taka röntgenmynd af tönninni til að geta metið ástand hennar. Tönnin kom risastór upp á sjónvarpskjá fyrir framan mig, en ég sá ekki nógu vel til að geta greint almennilega hvernig þetta leit út.
Þegar hann var búinn að fullvissa sig um að tannrótin myndi fást til að vera á sínum stað í nokkur ár í viðbót hófst hann handa við að undirbúa tönnina fyrir krónuna. Ég þarf að mæta tvisvar sinnum til viðbótar áður en verkinu er lokið.
Svona aðgerð kostar 300 evrur.
Það má geta þess að tannlæknar spara rafmagn eins og mögulegt er eins og allur almenningur gerir hér í landi. Hann slekkur á lampanum sem notaður er til að lýsa upp í mann í hvert sinn, sem hann þarf ekki að nota ljósið.
Það tók líka drjúga stund að bíða eftir að röntgentækið væri tilbúið til notkunar, því það er ekki haft í viðbragðsstöðu.
Þetta er til fyrirmyndar að vera ekki að bruðla með orkuna, en svona lagað sjáum við ekki á Íslandi.

Eftir hádegi gaf ég bóndabaununum meiri áburð og rótaði mold að þeim því þær eru farnar að vaxa dálítið.
Eftir garðvinnuna fórum við í góða gönguferð hér um þorpið.

Grjónsi

Veður: 6,2°/17,7° Skýjað, en sólin náði í gegn af og til.

Við erum búin að fara út að borða tvo daga í röð, svo það var ákveðið að hafa grjónagraut í dag, þó sunnudagur sé.
Það er gaman að fara út að borða, en það er með það eins og allt annað að það er best í hófi og alltaf er mjög notalegt að borða heima hjá sér.

Eftir matinn fórum við niður til Aveiro og fórum í góða gönguferð þar um gamla bæinn og niður með einu síkinu.
Það var nokkuð margt fólk á gangi í bænum og sumar eldri konurnar voru að viðra pelsana sína, þó hitinn væri 15°.
Það er vandséð að það séu not fyrir pelsa á þessari breiddargráðu þar sem hitinn fer helst ekki niður fyrir 10° á daginn.
Það eru ábyggilega mun meiri þörf að klæðast pelsnum innan dyra en utan, því fólk tímir ekki að hita upp íbúðirnar hjá sér og situr svo skjálfandi inni.
Auðvitað tylltum við okkur inn á kaffihús, við getum alveg sagt til að hvíla lúin bein.

Farartæki

Veður: 6,1°/12,9° úrkoma, en svo lítil að hún var vart mælanleg.

Á ferðalagi okkar í gær sáum við þetta sérkennilega faratæki.Þetta er þríhjól með sæti fyrir tvo, ökumann og farþega, en það sérkennilega er að þeir snúa bökum saman.Yfirbyggingin er aðeins fyrir ökumanninn.

Faratækið hér fyrir neðan er venjulegt lítið mótorhjól, en aftan í það er búið að festa tveggjahjóla handvagn. Þetta er nokkuð algeng sjón í öllum sveitaþorpum hér í Portúgal.

Afmæli

Veður: 4°/16,9° léttskýjað.

Það er búin að vera stíf dagskrá í dag eins og vera ber þegar frúin á afmæli.
Það var ákveðið að fara og skoða borg sem heitir Leiria.
Það eru 125 Km. vegalengd þangað suður eftir. Við vorum kominn í áfangastað klukkan að ganga tólf og fórum þá beint í að skoða kastala bæjarins. Þessi kastali er óvenjuvel farinn og frá honum er að sjálfsögðu mjög gott útsýni yfir bæinn og hans nágrenni.
Eftir að hafa þrammað um kastalann og hans nágrenni vorum við orðin vel svöng, svo við drifum okkur niður í miðbæ til að leita að veitingastað og í þetta sinn vorum við fljót að finna veitingastað sem okkur leist vel á.
Við urðum heldur ekki fyrir vonbrigðum með matinn, því hann var reglulega bragðgóður.
Eftir matinn röltum við svo um miðbæinn og fannst hann reglulega skemmtilegur, við erum alveg til í að fara þangað aftur og skoða bæinn betur.
Ég set eitthvað af myndum frá Leiria inn á myndasíðuna um helgina.
Á heimleiðinni komum við svo við í Aveiro svo afmælisbarnið fengi sína afmælistertu.

Loksins hjólað

Veður: - 2°/18,4° léttskýjað.

Í góða veðrinu í dag dreif ég mig út að hjóla, fór að vísu ekki neitt langt.
Nú er farinn að koma ilmur af mímósunni, en hún er rétt að byrja að opna blómin núna.

Brennuvargar

Veður: - 2,3°/17,7° léttskýjað.

Í dag týndum við saman greinarnar sem garðyrkjumaðurinn klippti af ávaxtatrjánum í gær og brenndum þeim.
Þessar greinar eru svo grannar að það svara ekki kostnaði að búta þær niður og nota í viðarofninn hér inni, það er heldur ekki gott að setja þær í safnhauginn, því þær eru of lengi að rotna þar.

Ávaxtatrén klippt.

Veður: 1,8°/16,8° að mestu skýjað.

Í morgunn þurfti ég að mæta til að láta taka blóðsýni til að fylgjast með á hvaða róli kólesterólið er hjá mér.
Staðurinn sem blóðsýnið er tekið opnar klukkan átta á morgnana, það er opnað svona snemma,því venjulega þarf fólk að mæta fastandi. Fyrst þegar við vorum að mæta þarna mættum við klukkan átta og lentum þá í að bíða lengi, því það virtust nær allir mæta á sama tíma.
Núna erum við farin að læra á þetta og mætum ekki fyrr en klukkan að verða tíu og þá er engin bið eftir að komast að.
Eftir sýnatökuna fórum við á kaffihús og fengum nýbakað brauð og kaffi.
Því næst renndum við niður til Aveiro, því mig langaði til að sjá nýja Vista stýrikerfið í verslunum og hvaða verð væri á því.
Það var ótrúlega mikill verðmunur á milli verslana. Við fórum bara í tvær verslanir sem eru nærri hvor annarri og á öðrum staðnum var verðið 270€ , en í hinni 400€. Þetta er ótrúlega mikill verðmunur á nákvæmlega sama hlut.
Það segja margir að maður eigi að bíða eitthvað með að skipta yfir í Vista. Vera rólegur og sjá til hvernig þetta reynist, ekkert liggi nú á, þetta hljómar mjög skinsamlega, en það er bara stundum leiðinlegt að vera skinsamur.
Ég er svo nýjungagjarn að ég vildi helst reyna þetta strax, en ég ætla að reyna að nota smávegis af skinseminni og bíða eitthvað, þó það sé frekar leiðinlegt að bíða.

Hann Antonio, en það er maðurinn sem klippir ávaxtatrén í garðinum okkar á hverju ári var hér í dag í sinni árlegu heimsókn.
Hann er búinn að klippa trén fyrir okkur í mörg ár.
Hann var áður garðyrkjumaður í bæ hér skammt frá, en er nú kominn á eftirlaun, en heldur áfram að vinna fyrir nokkra viðskiptavini.
Hann er orðinn 74ára, en hann er svo vel á sig kominn svo ég vona að hann sjái um að klippa trén okkar í mörg ár til viðbótar.
Maður sem klippti trén fyrir mig áður en ég fékk Antonio til þess var orðinn 84ára og vílaði ekki fyrir sér að fara upp í stiga til að klippa trén.
Læt fylgja með myndir af Antonio að störfum.

Veður

Veður: 5,3°/15,4° úrkoma 2 mm. í nótt. Skýjað í dag.

Óráðsía? Nei.

Veður: 2,6°/14,6° léttskýjað framan af degi, en síðdegis alskýjað og meira að segja örfáir regndropar.

Síðastliðinn fimmtudag orðuðum við það við nágranna okkar, þau Matthild og Manúel að við biðum þeim út að borða nú um helgina.
Það þurfti að beita nokkrum fortölum til að fá þau til að þiggja boðið,þau báru því við að það væri allt of dýrt að kaupa mat á veitingahúsi, þegar hægt væri að búa til mat heima og svo væri nú ekki gefi bensínið á bílinn. Við sögðumst bara eiga of mikið af peningum og þau yrðu að hjálpa okkur við að koma þeim í lóg með því að þiggja að fara með okkur út að borða.
Það talaðist svo til að við færum þetta á laugardeginum, en á föstudag bað Manúel um að þetta yrði frekar á sunnudeginum því hann ætlaði að nota laugardaginn til að klippa vínviðinn sinn. Ég veit ekki alveg hvers vegna lá allt í einu svo mikið á því að klippa vínviðinn, því enn er langt í að hann fari að laufgast.
Nú er messað klukkan tólf á sunnudögum, svo við komumst ekki af stað fyrr en klukkan eitt, en það var í góðu lagi við vorum komin á veitingahúsið klukkan hálf tvö. Fólk var að koma í mat til klukkan að verða þrjú.
Það varð ofaná eftir miklar vangaveltur hjá þeim hjónum að panta sér eina stóra nautakótelettu, saltfiskurinn freistaði þeirra líka, en nautasteikin var meira nýnæmi og hún bragðaðist líka mjög vel. Við fengum okkur saltfisk að hætti hússins og fannst hann mjög góður.
Nú er ég kominn fram úr sjálfum mér ég gleymdi að segja frá forréttunum.Það var sitt lítið af hverju,brauð, rækjur, melóna,presunto og pulsur.
Í eftirrétt var svo valið að fá pönnuköku fyllta með ís og skreytta með rjóma og súkkulaðisósu.
Hjónin skoluðu matnum niður með rauðvíni, en við fengum góðan árgang af vatni, sem við urðum ekki fyrir vonbrigðum með, það stóð fyllilega undir væntingum eins og ævinlega.
Eftir matinn röltum við einn hring á stórum útimarkaði sem er 28. hvers mánaðar í Aveiro. Það var mjög margt fólk á markaðinum eins og ævinlega. Markaðir eru mjög vinsælir hér, enda löng hefð fyrir þessum verslunarmáta hér í landi.
Myndin er af þeim hjónum ásamt steikinni góðu.

Veður

Veður: 3,8°/13,2° léttskýjað og nokkur gola.

Vetrarharka.

Veður: - 4,3°/13° léttskýjað.
Ég geri mér góðar vonir um að nú fari “vetrarhörkunum” hér að linna og það fari hægt hlýnandi næstu daga.
Næturfrostið má ekki verða öllu meira en þetta svo appelsínurnar hljóti ekki skaða af.
Við notuðum tækifærið þessa “köldu” daga til að brenna í viðarofninum hér inni það sem hefur fallið til í garðinum og er nýtanlegt í ofninn. Það entist ekki nema í tæpa tvo daga.
Það er fallegt að horfa í logana í ofninum, en mikið er nú þægilegra og þrifalegra að kveikja bara á lofthituninni/kælingunni.

Ég átti pantaðan tíma hjá heimilislækninum, því ég var að verða búin með lyfin við kólesterólinu. Ég átti tíma klukkan fjögur, en var ekki búinn fyrr en að ganga sjö, ekki var það vegna þess að ég væri svo lengi inni, heldur er þetta bara venja hér að gefa manni tíma svona löngu áður en von er um að maður komist að.
Nú á ég að fara og láta rannsaka í mér blóðið svo sjá megi hversu hátt kólesteról magnið í blóðinu er, auð vitað vona ég að það sé sem lægst, en mælingin sker úr með það.

Meðan ég beið stytti Þórunn sér stundir við að fara í búðir og það sannaðist hjá henni eins og oft áður “ að oft er leitað langt yfir skammt”.
Hún var búin að fara í nokkrar búðir í Aveiro til að leita sér að flík sem hana vanhagaði um, en fann ekkert sem hentaði og ekki töldum við líklegt til árangurs að leita í litlu búðunum í Albergaria, en það fór nú samt svo að þar var til flíkin sem hún hafði verið að leita að.

Þjónustan komin í lag.

Veður: 0,9°/14° úrkoma 2 mm. Í nótt, í dag var léttskýjað.

Í dag fengum við í hendur bókina yfir GPS tækið í bílnum.
Við hefðum sennilega átt að kvarta fyrr formlega yfir þeirri þjónustu sem við vorum að fá þarna, því eftir að við kvörtuðum hefur þjónustan verið til fyrirmyndar, eða kannski bara eins og hún átti að vera alla tí.
Nú liggur við að það sé rúllað út fyrir okkur rauðum dregli þegar við komum á svæðið.

Veður

Veður: -3,3°/12,7° léttskýjað.

Skemmtileg hönnun

Veður: - 1,5°/14° að mestu léttskýjað.
Eins og sjá má á hitatölunum hér fyrir ofan er talsvert svalara í verði núna en verið hefur að undanförnu, en svona sveiflast hitinn upp og niður á þessum árstíma.

Síðasta sunnudag þegar við fórum í stóru gróðrarstöðina skammt utan við Ovar sáum við nýja verslunarmiðstöð, en það virtist vera svo margt fólk þar á þeim tíma að við ákváðum að fara í þessari viku í skoðunarferð þangað og í dag létum við verða af því að fara á staðinn.
Við lögðum af stað skömmu fyrir mat með það í huga að láta verða af því að reyna hvernig er að fá sér að borða á einhverjum af þeim mörgu matsölustöðum við þjóðveginn þar sem vörubílstjórar og aðrir þeir sem eru á ferð og flugi venja komur sínar.
Við höfum oft minnst á að það væri fróðlegt að fá sér að borða á slíkum stað en af einhverjum ástæðum ekki komið því verk fyrr en í dag.
Það var svo kalt inni á staðnum sem við litum fyrst inn á að við treystum okkur ekki til að sitja þar inni. Næsti veitingastaður var heldur minni og þar var upphitun, þó hún væri að vísu í lágmarki. Þarna fengum við ágætis steiktan fisk að borða og staðurinn og þjónustan var í góðu lagi og ekki var hægt að væla yfir verðinu 10€ fyrir okkur bæði.
Jæja þá erum við búin að fá aðeins nasasjón af hvernig þessi veitingastaðir við þjóveginn líta út, en þurfum við tækifæri að gera betri samanburð á þeim.
Við komum semsagt vel mett í áfangastað, því var nú ver því þar er nýtískulegur veitingastaður með miklu úrvali af mat og við gætum vel hugsað okkur að skreppa þangað seinna til að bragða á einhverju sem þar er á boðstólum.
Við fengum okkur reyndar kaffi og köku þegar við vorum búin að ganga okkur upp að hnjám við að skoða í verslanir.
Það var gaman að sjá hvernig veggirnir inni í húsinu voru skreyttir, það voru framhliðar húsa, svo hver gangur hafði eiginlega síma sérstöku götumynd frá því sem var þarna við ströndina fyrir rúmum hundrað árum. Það voru líka gamlar stórar ljósmyndir frá brimlendingu við sendna ströndina og svo fólk að vinna við aflann.
Þarna á einum ganginum er líka falllegur bátur sem notaður hefur verið á stóru síki sem er þarna skammt frá og í bakgrunn er mynd af umhverfinu, svo þetta verður mjög raunverulegt að sjá.
Mér fannst reglulega gaman að koma í þetta hús og get vel hugsað mér að skoða það fljótlega aftur.
Ég er búinn að setja nokkrar myndir inn á myndasíðuna og þær ættu að lýsa vel því sem fyrir augu bar í dag.