Takk fyrir liðin ár

Veður: 12,5°/19,9 úrkoma 2mm. Það hefur verið þurrt, en skýjað í dag.

Þá er komið að því að kveðja þetta góða ár sem nú er senn á enda. Best að kveðja þetta ár með bjartsýni og vona að það ár sem nú tekur við verði eins gott og það sem er að kveðja,ef ekki bara enn betra.
Það komu óvenju margir gestir til okkar á síðastliðnu sumri, sem var auðvitað mjög ánægjulegt. Það er alltaf gaman að fá fólk í heimsókn og það verður enn ánægjulegra þegar búið er erlendis.
Við vonum að fólk verði duglegt að heimsækja okkur á næsta ári.
Að lokum þakka ég öllum sem ég hef átt samskipti við á árinu, hvort sem það hefur verið í gegnum síma, með bréfaskriftum eða þá að hittast augliti til auglitis kærlega fyrir samskiptin.
Ég óska öllum velfarnaðar á komandi ári og um ókomin ár.

Veður.

Veður: 12,5°/15° úrkoma 5 mm. Rigningarúði síðdegis.

Veður

Veður: 1,5°/15° smávegis rigning, en svo lítið að það mældist varla.
Þetta er í fyrsta sinn síðan 7. desember sem kemur dropi úr lofti hér.

Garðvinna

Veður: 1,7°/18,8° léttskýjað.

Fórum í verslunarferð í morgunn, því ísskápurinn var kominn með alveg hræðilegt garnagaul. Það kom á óvart að í sumum verslunum eru byrjaðar útsölur, raunar er þetta nefnd tilboð, því útsölur eiga ekki að hefjast fyrr en 7 janúar.
Eftir hádegi unnum við í garðinum. Klipptum niður runna, klipptum greinar af lárviðartrénu, því þær náðu orðið út fyrir garðinn og út á götu. Einnig þurfti að saga nokkuð margar greinar af pálmunum, því pálminn virðist loka fyrir næringu til neðstu greinanna svo þær fölna og verða ljótar og þá er ekki annað að gera en fjarlægja þær.
Þessi afskurður var svo brenndur.

Skuldseigur

Veður: -2°/18,2° heiðskýrt.

Þá eru blessuð jólin liðin og komið að skuldadögum, vegna ofáts og letilífs, nú er komið að því að streða og strita til að losa sig við aukakílóin.
Ég byrjaði daginn vel með því að far á stigvélina, en mikið finnst mér leiðinlegra að puða á henni en að hjóla.
Eftir hádegi fór ég svo í góðan hjólatúr og mikið var skemmtilegra að puða á hjólinu, en maskínu sem ekki hreyfist úr stað hvernig sem ólmast er.
Þegar verið er að hjóla er alltaf eitthvað nýtt sem ber fyrir augun, jafnvel þó búið sé að fara þessa sömu leið óteljandi sinnum. Það er mismunandi ilmur í lofti eftir árstíðum og staðsetningu. Nú bíð ég eftir því að fara að finna ilminn af mímósunni. Ég tók eina grein af mímósu með mér heim í dag til að reyna hvort hún gefur ekki frá sér ilm þegar hún er komin inn í hita.
Í dag fór ég eftir hjólabraut sem verið er að vinna við hér inni í Vouga dalnum. Núna er vinnuflokkur að vinna við að setja handrið meðfram brautinni þar sem er hátt út af henni, en það er nokkuð víða þverhnípt niður af brautinni, svo það er mikið öryggi í að fá handrið þarna.

Annar í jólum ?

Veður: -2,4°/17° skýjað fyrst í morgunn, en bjartviðri eftir hádegi.

Hér er ekkert sem heitir annar í jólum og ekki heldur neitt sem heitir aðfangadagur jóla. Það er bara einn jóladagur og þar með búið.
Við fórum í könnunarferð í dag til að sjá hvort verslanir væru ekki opnar og gátum ekki séð betur en að í dag væri bara eins og hver annar virkur dagur. Það er samt eitthvað um að fólk taki sér frí á milli jóla og nýárs, geimi sér daga af sumarleyfinu til þess.
Íbúarnir í Austurkoti voru á skjön við aðra í nágrenninu og höfðu sinn annann í jólum eins og þeir eru vanir. Vegna þess að það var engin terta bökuð í Kotinu fyrir þessi jól brugðu íbúarnir í Kotinu sér á kaffihús og fengu sér eina sneið af góðri hnallþóru.

Jóladagur

Veður: -2,7°/15,4° léttskýjað.

Þessi pistill átti að réttu lagi að birtast á jóladag, en þar sem við vorum boðin í heimsókn og komum ekki heim fyrr en um miðnætti kemur hann bara núna á annan í jólum.

Eftir hádegi í gær fórum við niður að strönd til að fara í gönguferð við hafið. Það var alveg blankalogn og sjórinn alveg spegilsléttur. Ég er oft búinn að vera þarna á ströndinni en minnist þess ekki að hafa séð sjóinn svona sléttan áður. Það voru nokkrir á rölti á hafnargarðinum ásamt okkur, en það sat þar enginn með veiðistöngina sína að þessu sinni.

Klukkan fimm fórum við svo í heimboð og af fenginni reynslu, þá fórum við í boðið í mjög hlýjum fatnaði.
Fjölskyldan sem við voru boðin til hafði verið í boði hjá bróðir konunnar og var því nýkomin heim þegar við komum, svo húsi var alveg jökulkalt þegar við komum.
Það var strax gengið í að kveikja upp í arninum, svo þeir sem næstir honum voru höfðu einhvern hita á þeirri hlið sem að eldinum snéri. Heimilisfólkið skiptis á um að fara að arninum og snúa sér þar til að fá hita á allann kroppinn.
Það var byrjað á að bjóða okkur kökur og þurrkaða ávexti.
Þau hjónin eiga tvær dætur og sú yngri sem er sextán ár hefur mjög gaman af að baka og stússast í matargerð.
Bróðir konunnar leit inn og færði heimasætunum á bænum sitthvora bókina i jólagjöf.
Síðar kom svo systir húsbóndans ásamt tveim dætrum þeirra og einum mjög litlum hundi. Þau stoppuðu stutt og þáðu engar veitingar, því þau voru að koma úr öðru boði.
Klukkan tíu var svo komið að því að borða kvöldmatinn.
Maturinn var í tveim leirfötum í öðru fatinu var lambakjöt og kartöflur, en í hinu fatinu var svínakjöt og kartöflur. Þetta var svona dæmigerð portúgölsk matreiðsla, búið að hafa kjötið í ofni i nokkra klukkutíma. Þegar búið er að sjóða kjötið svona lengi, er eiginlega komið af því kæfubragð svo það skiptir litlu máli af hvaða skepnu kjötið er, það er búið að tapa öllum séreinkennum.
Samt vilja dæturnar á þessu heimili frekar borða svínakjöt, en foreldrarnir halda meira upp á lambakjötið.
Eftirrétturinn var svo ávaxtabúðingur.
Nú fannst okkur vera komið nóg af áti þennan dag, en þá voru kökurnar settar á borðið og ætlast til að við tækjum til við þær á ný.
Það var aðeins fundið að því við okkur hvað við gerðum matnum lítil skil. Bóndinn hélt að ég hlyti að fara svangur frá þeim.
Það var greinilegt að bóndinn býr við mikið kvennaríki, honum veitti ekki af að fá fulltrúa frá einhverju jafnréttisráði til að sjá sína bágu aðstöðu á heimilinu.
Hann hefur gaman af að tala, en í hvert sinn sem hann reyndi að fá að taka þátt í samræðum var þaggað niður í honum.

Gleðileg jól

Veður: -2°/15,3° heiðskýrt.

Eins og ég minntist á í gær var ég farinn að hafa verulegar áhyggjur af því að jólakötturinn næði að setja klærnar í hana Þórunni mína, því ég var ekki búinn að kaupa neina jólagjöf handa henni og treysti mér ekki til að velja neitt upp á eigin spýtur og Þórunn var ekki tilbúin að velja neitt handa sjálfri sér, svo þetta var eiginlega að stefna í mesta óefni.
Hvort hún hefur verið farin að heyra hvæsið í jólakettinum veit ég ekki , en allavega var hún tilbúin að koma í verslunarferð í morgunn og velja sér gjöf.
Ég minnist þess ekki að hafa áður farið út á aðfangadag til að kaupa jólagjafir, svo þetta var bara góð tilbreyting. Það var margt um manninn í verslunum hér í allan dag, enda hefst hátíðin hér ekki fyrr en um miðnætti, svo það eru engin helgispjöll að hafa verslanir opnar fram á kvöld.
Það blessaðist að finna gjöf, svo þungu fargi var af mér létt, en jólakötturinn sem var farin að brýna klærnar er að sama skapi vonsvikinn býst ég við.

Graca og Artur voru búin að bjóða okkur í mat til sín í dag, svo við mættum þar þegar þau voru búin að fara til kirkju, en í kirkju fara þau hvern einasta sunnudag. Við borðuðum svo góðan mat hjá þeim og áttum mjög ánægjulega dagstund með þeim.

Eftir heimsóknina hjá Graca fórum við aftur í verslunarleiðangur, því nú var Þórunn komin á bragðið og fékkst til að koma í Bodyshop og þar tókst að finna smáræði til að bæta við jólagjöfina.
Þegar við vorum þarna var klukkan farin að ganga fimm, en enn var mikil ös í verslunum, enda veðrið mjög gott og gaman að rölta milli verslana.

Nú er kominn tími til að snúa sér að jólahaldinu, því segi ég við þig sem lest þessar línur. Gleðileg jól.

Í jólamat hjá Graca og Artur

Hræddur við jólaköttinn.

Veður: -3,3°/14,4° heiðskýrt.

Í gærkveldi vorum við boðin til Patriciu og Rui, við áttum notalega stund með þeim. Þau búa í nýlegri dæmigerðri blokkaríbúð á þriðju hæð. Eina upphitunin í íbúðinni er viðarofn í arinstæði í stofunni, það var rétt nægilega heitt þar inni af því við vissum á hverju við áttum von og vorum því vel búin. Annars staðar í íbúðinni var jökulkuldi.Það er ótrúlegt að það skuli vera kominn tuttugasta og fyrsta öldin og það er verið að bera brenni neðan úr kjallara upp á þriðju hæð og hafa ekki yl nema í einu herbergi, en svona er þetta bara og fólk lætur sig hafa þetta.
Við vorum leyst út með gjöfum þegar við fórum. Patricia gaf Þórunni mynd sem hún var búin að sauma út, en hún er mjög mikil hannyrðakona. Ég fékk flösku af góðu Portvíni, sem ég vona að einhver hjálpi mér við að koma í lóg, því ég er vægast sagt mjög lítið gefin fyrir drykkju enn sem komið er.

Eftir hádegi fórum við til Aveiro svona rétt til að upplifa einhverja Þorláksmessu stemmingu í búðum.Það var margt um manninn í bænum og í verslunum.
Við fórum heim án þess að finna jólagjöf handa Þórunni, svo það eru að verða ískyggilega miklar líkur á að jólakötturinn eigi eftir að klóra eitthvað í hana, en enn er von um að úrrætist.
Við heilsuðum upp á Pétur kunningja okkar í leiðinni, en hann býr í Aveiro.

Veður

Veður: -2,8°/14,6° heiðskýrt.

Næturfrost.

Veður: -3,2°/14,2° Léttskýjað.
Eins og sjá má á lágmarkshitanum var svalt í nótt, en sæmilega notalegt í sólinni um miðjan daginn. Jörð var hvít af hrími í morgunn, en það er ekki óalgengt hér á þessum árstíma.

Gróðurmold

Veður: - 0,8°/14,3° léttskýjað.

Eins og sjá má á hitatölunum var fremur svalt í morgunn, svo ég beið með það framyfir hádegi að fara út í garð að vinna, en þá var líka orðið þæglegasta veður til að vinna úti.
Ég var að sá bóndabaununum í dag, en fyrst þurfti að setja áburð í beðið og tæta honum saman við moldina.
Það er svo merkilegt að það er sama góða gróðrarlyktin af moldinni hér og í Flóanum forðum daga.
Það er alltaf einhver sérstök tilfinning að sjá gróðurmold sem búið er að sá í, það er einhver tilvísum á framtíð og að lífið haldi áfram.
Það er líka svo gaman að fylgjast með því þegar það sem sáð hefur verið fyrir fer að gægjast upp úr moldinni.
Þórunn setti niður hvítlauk og nú er bara að bíða og sjá hver árangurinn af þessu verður hjá okkur.

Baunabeð

Fjárhúsið

Veður:- 0,5°/15,3° léttskýjað.

Myndin hér fyrir neðan er af jólaskreytingu í slökkvistöðinni í þjónustubænum okkar Albergaria. Það gefur víða að líta núna fyrir jólin svona skreytingar af mismunandi stærð og gerð.
Fjárhúsið ásamt fjölskyldu þess finnst líka á flestum heimilum hér í landi. Sumir búa þetta til sjálfir, en svo er líka hægt að fá þetta keypt í verslunum af mismunandi stærðum og gerðum.

Skólastarf.

Veður: 3°/15,7° þoka í morgunn, síðan mistur en að lokum léttskýjað.

Joana var hér í pössun í morgunn, því Mamma hennar þurfti að mæta á fund.
Þær borðuðu svo hjá okkur mæðgurnar, svo hádegismatur var seinna en vant er á þessu heimili. Graca reiknaði með að vera komin af fundinum klukkan eitt, en af fenginni reynslu reiknuðum við ekki með að hún kæmi fyrr en hálftíma síðar en hún reiknaði með og það reyndist rétt.
Starf kennara hér virðist að mestu fara í að sinna skrifræðinu, það virðist þurfa að fylla út eyðublað fyrir hvert viðvik sem gert er, en svo vita kennararnir ekkert hvað verður um þennan pappír allan sem þeir senda frá sér.
Fundurinn í dag var til þess að kennararnir gætu rætta saman um hegðun nemenda sinna, en ef nemandinn á við einhver vandamál í námi , eða hegðun að stríða er lítið eða ekkert um úræði til bóta handa honum. Það er því vandséð hvert gagn slíkur fundur sem þessi gerir.

Veður : 1,5°/15,6° léttskýjað.

Fórum síðdegis til Aveiro, því Þórunn hafði áhuga fyrir að taka myndir af ljósaskreytingum þar þegar farið væri að rökkva.
Við byrjuðum á að fara í stóra verslunarmiðstöð, þar sem við fengum okkur síðdegiskaffi áður en myndatakan hæfist. Þar inni tók Þórunn fullt af myndum, en eftir það fórum við í miðbæ Aveiro þar sem Þórunn tók mikið af myndum úti, enda er þar fullt af fallegum ljósaskreytingum.
Sem sýnishorn læt ég fylgja eina mynd sem ég tók af bát á síkinu sem er í miðbænum.

Veislusalur

Veður: - 1,3°/16° léttskýjað.

Þórunn notaði morguninn til að skreyta húsið fyrir jólin ja reyndar bæði úti og inni, því veröndin státar líka af jólaskrauti.
Það eru líklega liðnar um tvær vikur síðan ég sagði frá því að ég væri búin að slá grasflötina í síðasta sinn á þessu ári, en það var ekki rétt, því í dag fannst mér vera komið það mikið gras að það væri nauðsynlegt að slá einu sinni enn. Það er ekki amalegt að finna grasilm í lofti svona rétt fyrir jólin. Það eru sennilega ekki margir á Íslandi sem tengja saman grasilm og aðventu.

Graca vinkona okkar bauð okkur til sín í dag til að sýna okkur hvað veislukjallarinn sinn væri orðin flottur, en fyrsta veislan á að vera þar í kvöld.
Það var stolt húsmóðir sem sýndi okkur hversu fín aðstaða þetta væri.
Ég læt fylgja með mynd sem ég tók þarna í dag, en ég tek það fram að það var eftir að setja dúk á borðin þegar ég tók myndina. Það var meiningin að fólkið sitji við langborðið. Maturinn sem á að vera er keyptur af veitingahúsi og það borgar hver fjölskylda fyrir sig.
Venjan hefur verið sú að þessar fjölskyldur sem koma þarna saman í kvöld hafa farið saman á veitingahús einu sinni á ári, en þar sem Graca hefur yfir svona “fínu” húsnæði að ráða þótti tilvalið að nota það.
Fólk hér í landi kippir sér ekki upp við að sitja í kulda við að borða, því það er almennt lítið eða ekki kynnt í heimahúsum, helst er að það sé arinn í einu herbergi í hverri íbúð og mörg veitingahús eru án upphitunar enn, þó það hafi fjölgað talsvert núna á seinni árum þeim veitingastöðum sem hafa einhverja upphitun.

Leti????

Veður: - 1,8°/17,8° heiðskýrt. Eins og sjá má á lágmarkshitanum fraus örlítið hér í nótt.

Við fórum í leikfimi í morgun, ekki veitti af eftir sukkið á litlu jólunum í gær.
Ég var held ég búin að minnast á að við hefðum verið að skoða þrekæfingatæki til að hafa hér heima. Nú vorum við búin að ákveða að fjárfesta í slíku tæki, svo við fórum til Aveiro til að skoða markaðinn betur. Fórum í stóra íþróttavörubúð það sem var talsvert úrval af tækjum eins og við vorum að spá í. Þau tæki voru portúgölsk og í þeirri verslun var þeim tækjum talið það helst til tekna að það væri ekki langt að senda þau, ef þau þyrftu viðgerðar við. Einhvern veginn treystum við ekki almennilega á vörugæði portúgölsku framleiðslunnar, svo við völdum frekar að eiga viðskipti við verslun sem var með frönsk tæki, en framleidd í Kína. Það er að vísu nokkuð langt að fara til að fá tækið viðgert ef það þarf að fara með það til framleiðslulandsins.
Ég kalla þetta tæki skíðagönguvél, því það er staðið á því og gengið um leið og haldið er í stangir, sem eru hreyfðar eins og skíðastafir. Þannig að það fæst talsvert mikil hreyfing á allan skrokkinn þegar þetta tæki er notað.
Nú er bara eftir að sjá hversu duglegur maður verður við að nota þetta tæki, en það var keypt í þeirri góðu trú að letin réði ekki of miklu, en hún er lunkin að ná sínu fram, þrátt fyrir góðan vilja hjá manni til að snúa á hana.

Matur matur.

Veður: 0,4°/18,9° Heiðskýrt.

Í góða veðrinu í morgunn vorum við að vinna í garðinum. Þórunn klippti rósirnar niður og gróðursetti sprota af rósum sem nágrannakona hennar gaf henni, afbrigði sem við áttum ekki. Hér er nóg að stinga afklipptum legg af rós ofan í moldina um þetta leiti árs, þá rótar hann sig og ber blóm næsta sumar.
Ég klippti hekkplöntur og setti safnhaugamold í spildu sem á að nota fyrir bóndabaunir, á eftir plægði ég svo spilduna.
Klukkan þrjú mættum við svo á litlu jólin með leikfimi systkinum okkar. Þetta voru tveir flokkar sem héldu litlu jólin sameiginlega, svo þetta voru nær fimmtíu manns þarna.
Það komu allir með mat með sér og það var ekki verið að klípa það við nögl sér. Maturinn sem settur var á borðið hefði örugglega verið yfirdrifinn handa tvö hundruð manns.
Einhverjar leikfimisystra minna höfðu greinilega farið út í hænsnahúsið sitt í gær og snúið eina af sínum hamingjusömu hænu úr hálsliðnum og nú var hænan komin þarna á borðið steikt og niðurbútuð og bragðaðist bara vel.
Það er mikill munur á kjötinu af hamingjusömu hænunum og þeim sem eru aldar upp í búrum, kjötið af þeim fyrrnefndu er mun seigara.
Einnig var verið með steikt svínakjöt og ein konan kom með kjötkássu í stórum potti. Nú svo voru auðvita saltfiskbollur, en þær þykja alveg ómissandi á hverju hlaðborði.
Þarna voru líka nokkuð mörg afbrigði af kökum.
Við fórum með eplaköku, sem líkaði vel, en það þorði enginn að bragða á smákökunum sem við vorum með. Fólk veit einfaldlega ekkert um smákökur. Ein konan spurði Þórunni hvort þessar kökur væru gerðar úr svínafitu og súkkulaði.
Leikfimikennaranum var fært úr í jólagjöf frá nemendunum, sem framtakssamar konur í hópnum höfðu séð um að kaupa.´Það var svo talsvert hallærislegt að sjá til þeirra þegar þær voru að fara um salinn og telja hve margir væru mættir til að taka þátt í að greiða fyrir gjöfina og láta kennarann sjá það til sín. Að talningu lokinni kom svo framkvæmdahópurinn saman til að deila kostnaðinum á þátttakendur og þar var sko ekkert verið að hvíslast á um þetta.
Þegar allir höfðu borðað nægju sína og rúmlega það var stiginn dans.
Það eru myndir frá samkvæminu komnar inn á myndsíðuna mína. Smellið á Myndir hér til hægri á síðunni.

Kökubakstur

Veður: 4,7°/18,7° heiðskýrt.

Aðalverkefni dagsins hjá okkur var að baka smákökur til að taka með okkur á litlujólin í leikfiminni á morgunn, í fyrramálið á svo að baka eplaköku, en eins og allir vita er eplakakan best alveg nýbökuð.
Í dag bökuðum við piparkökur, súkkulaði rúsínukökur og hafrakex. Það er lítið um bakstur á smákökum á heimilum hér og jafnvel að fólk sé aðeins hrætt við að bragða á því sem það ekki þekkir, en þeir sem eru kjarkaðir og þora að smakka á kökunum okkar kunna yfirleitt að meta þær.
Hér er mest um bakstur á ýmiss konar formkökum og það er ekki verið að spara eggin í þær, það er verið að nota frá sex upp í tíu egg í eina köku. Þessar uppskriftir hafa örugglega orðið til áður en vita var hversu mikið kólesteról er í eggjum.
Eftir baksturinn fórum við svo með síðustu jólakortin og pakkana á póst, svo nú er eiginlega bara framundan að bíða eftir jólunum, en ég hef trúlega yfir mun meiri þolinmæði að ráða nú en þegar ég var nokkrum áratugum yngri, þá gat biðin verið talsvert erfið og oftar en ekki var stolist til að þukla pakkana og reynt að giska á um innihaldið í þeim.

Graca og Artur komu í kvöld að sækja borðið sem þau ætla að nota í veislukjallaranum sínum. Við lánuðum þeim líka nokkra stóla.

Veður

Veður: 2,4°/15,5° Þunn skýjaslæða, sem sólin náði í gegnum af og til.

Hjólað á ný.

Veður: 0,2°/15,5° léttskýjað.

Byrjuðum útréttingar dagsins á að fara á pósthúsið til að kaupa frímerki á jólapóstinn, en þar sem það var löng bið eftir afgreiðslu brá ég mér á meðan Þórunn beið til tannlæknisins, en hann er í sömu götu og Pósthúsið.
Ég var svo óheppin að það datt fylling úr tönn hjá mér svo ég ætlaði að panta tíma, en var þá svo heppin að það var laus tími eftir hálftíma, svo ég gat beðið og er nú komin með nýja fyllingu í tönnina. Venjulega er vikubið hjá tannlækninum.
Þegar þessum erindum var lokið fórum við til Aveiro til að kaupa eitt og annað smálegt og einnig lét ég á það reyna hvort fyllingin í tönninni dygði til síns brúks svo við fengum okkur að borða í leiðinni og enn er fyllingin á sínum stað og ég vona að svo verði um ókomin ár.
Um tvöleitið fór ég svo að hjóla, ég hef ekkert hjólað síðan ég var keyrður niður fyrir rúmri viku, en nú gekk allt vel og bílstjórarnir sýndum mér fulla tillitssemi eins og venja þeirra er, þetta var algjör undantekning þegar ég var keyrður niður. Nú rennur vatn á ótrúlegustu stöðum á þeirri leið sem ég fór í dag eftir rigningarnar að undanförnu, en allt í þeim farvegum sem það á að vera.

Lokuð leið.

Veður: 0,3°/15,5° heiðskírt, en dálítil þoka fyrst í morgunn.

Í gær brugðum við okkur af bæ á bílnum og fórum sem leið liggur eftir þjóðvegi N 16 hér upp úr dalnum og eins og svo oft áður þegar farið var yfir brúna á Caima ánni var því gefið auga hversu hátt vatnsborðið í ánni væri, en það hefur verið talsvert breytilegt í rigningunum að undanförnu. Að þessu sinni var áin bara bakkafull.
Þegar við svo komum að brúnni rúmum klukkutíma síðar og ætluðum yfir hana á leiðinni heim var lögregla á veginum sem lokaði aðgangi að brúnni, en vísaði okkur á að fara í gegnum þorpið í Vale Maior yfir brú sem er kölluð gamla brúin, en þessi vegur í gegnum þorpið liggur um þröngar og bugðóttar götur.
Við vorum að tala um það okkar á milli að það hefði sennilega orðið slys í námunda við brúna og leiddum ekki hugann frekar að þessu.
Í gærkvöldi vorum við svo boðin í hús hér í dalnum og þá var okkur sagt að það hefði grafið undan einum stöpli brúarinnar og það væri búið að loka henni þar til viðgerð hefði farið fram.
Þessi brú mun vera nálægt eitthundrað ára gömul.
Það eru ekki nema þrjátíu ár síðan um þennan veg lá mikið af umferðinni frá vesturströnd Portúgals til Spánar, en nú er kominn nýr vegur sem leysti þennan af hólmi.
Við fórum í góða veðrinu í dag og tókum myndir af brúnni, ég reyni að setja eina af þeim myndum með þessum pistli, en svo eru fleiri myndir á myndasíðunni minni.
Hvort ástæðan fyrir því að það grefur undan stöplinum nú eftir að hafa staðið af sér stórflóð og vatnsleysi til skiptis í eitthundrað ár gæti verið sú að fyrir tveim árum var farvegurinn í nánd við brúnna hreinsaður og rýmkaður aðeins, skal ég ósagt látið. Það hefur ekki komið almennilegt flóð í ána síðan farvegurinn var hreinsaður fyrr en nú.

Veður

Veður: 3,5°13,3° úrkoma í nótt 16 mm. Að mestu þurrt í dag og sólarstundir af og til.

Frídagur

Veður: 6,1°/12,2° úrkoma 30 mm. Skúraslembur í dag, það er kalt í lofti.

Fórum í morgunn með lausa drifið sem við keyptum í gær og ekki fékkst til að vinna í búðina þar sem það var keypt. Stúlkan sem við töluðum við kannaðist strax við hvert vandamálið var, það vantaði að forrita diskinn og það gerði hún fyrir okkur á stundinni, svo nú er Þórunn komin með afrit af sínum gögnum eins og vera ber.
Það var margt um manninn í verslunum í dag, enda frídagur hér og fólk hér fær tvöföld laun í desember, svo það hefur aðeins meira handa á milli núna en venjulega.
Það væri full þörf á að tvöfalda lægstu launin hér, því þau eru svo ótrúlega lág, að ég skil ekki hvernig fólk á að geta framfleytt sér af þessum launum.
Þessi frídagur í dag er tilkomin vegna Maríu meyjar.

Bilað?

Veður: 9,8°/16,3° úrkoma 50 mm. Rigning í allan dag.

Í dag fórum við til Aveiro og keyptum laust drif til að nota við tölvuna hennar Þórunnar, því hún er komin með svo mikið af myndum og örðum gögnum í tölvuna, sem rétt er að eiga afrit af annars staðar.
Á heimleiðinni ókum við meðfram Vouga ánni þar sem hún rennur um láglendi og þar þarf vatnsborðið í ánni ekki að hækka nema um fimmtíu sentímetra til að ná upp á veginn sem við ókum eftir. Ég get vel ímyndað mér að vegurinn verði kominn undir vatn á morgunn, því það er búið að rigna í allan dag.
Eitthvað er bogið við þetta nýja drif sem við keyptum, eða þá okkur, því okkur tekst alls ekki að fá það til að vinna. Við erum búin að reyna að tengja það við báðar tölvurnar, en án árangurs, svo það er víst ekki annað að gera en fara aftur í verslunina og fá þá til að reyna þetta og leiðbeina okkur ef við höfum ekki farið rétt að við að tengja þetta. En það á ekki að þurfa að gera annað en setja þetta í samband og byrja svo að vinna.

Í kvöld horfðum við á klukkustundar langa mynd í sjonvarpinu hér um náttúru Íslands. Saga landsins frá landnámsöld var fléttuð inn í myndina. Þessi mynd er örugglega framleidd á Íslandi, en það var búið að talsetja hana á portúgölsku.

Veður

Veður: 6°/15,2° úrkoma 11 mm. Að mestu þurrt í dag.

Veisluumhverfi

Veður: 9°/15,2° úrkoma 50 mm. Rigning.

Það er helst til frásagnar í dag að það var að mestu hkjótt í leikfiminni í morgun. Fólk bara einbeitti sér að því að gera æfingarnar, en venjulega er þetta eins og í fuglabjargi og þá vill verða misbrestur á að fólk geti einbeitt sér að æfingunum meðan það er verið að spjalla.
Graca kom í heimsókn í dag meðal annars til að skoða borðið sem við létum smíða til að hafa hér á veröndinni, en hefur nú verið leyst af hólmi af öðru borði og var því notað sem vinnuborð í eldiviðargeymslunni.
Graca leist mjög vel á borðið til að nota í veislukjallaranum sínum.
Ég tala um veislukjallara, því það er meininginn hjá henni að ef hún býður fólki heim, þá verði því boðið í kjallarann. Það er nú verið að setja upp vask og smáeldhúsinnréttingu. Þetta á að vígja núna þann 16. desember, en þá bjóða þau nokkrum vinahjónum í heimsókn ásamt börnum líklega um 20 manns og Graca finnst ekki koma til greina að hleypa þeim inn í stofuna sína, það gæti eitthvað skemmst.
Hún leggur einhverja aðra merkingu í orðið kósi en við erum vön, því hún segir að þetta verði svo kósí þarna í kjallaranum, ómáluðum og að mestu ópússuðum. Næsta veisla á svo að vera í kjallaranum í maí, en þá verður veisla vegna fermingar dóttur hennar. Þetta er einhver lenska hér að vilja halda veislur í bílskúrum, eða kjöllurum, þó fólk hafi gott húsrými.

Jólaljós

Veður: 14,7°/17,5° úrkoma 33 mm. Rigning í nótt, en skúrir í dag.

Settum upp ljósaskreytingu á veröndina og bílskúrinn í dag í tilefni jólanna.

Aðventa

Veður: 5°/15,8° úrkoma 30mm. að mestu þurrt í nótt, en rigning í dag.

Þessi fyrsti sunnudagur í aðventu var rólegur og notalegur hjá okkur.
Fórum út að borða í hádeginu á stað í Aveiro sem heitir Torgalo. Þar fengum við okkur kjúkling að borða að hætti hússins, sem bragðaðist mjög vel, auðvitað var ekki látið þar við sitja, ábætir og kaffi var einnig innbirt með góðri list.
Við litum inn í eina búð á heimleiðinni, svona rétt fyrir siðasakir.
Síðdegis horfðum við á flotta jólatónleika frá Þýskalandi í sjónvarpinu, en við vorum svo heppin að Jón vinur okkar á Spáni lét okkur vita um tónleikana, annars er hætt við að þeir hefðu farið framhjá okkur.

Veður

Veður: 10,3°/18,8° úrkoma 50 mm. Rigndi í nótt, en að mestu þurrt í dag og sólarstundir.

Desemberrós

Veður: 5,9°/19,2° sólarstundir fram eftir degi, en skýjað síðdegis.

Ég slapp svo vel frá því í gær þegar keyrt var á mig að ég hef verið að velta því fyrir mér í dag hvort ég gæti ekki verið gott efni í áhættuleikara, bara að stunda það að lenda í árekstrum. Að athuguðu máli held ég að ég sleppi þessu, það er engan veginn víst að ég slippi svona vel frá slíku í annað sinn. En ég er ágætur í svona lagað að því leyti að ég held alveg ró minni á meðan á þessu stóð og gerði það sem í mínu valdi stóð til að sleppa sem best frá þessu og varð ekki einu sinni skelkaður eftir á.

Verkefni dagsins var að hreinsa í burtu mosa og gróður af þakinu á húsinu hérna, en slíkt þarf að gera einu sinni á ári. Það var ekki amalegt að sitja upp á þaki í veðurblíðunni í dag og bursta óhreinindin í burtu.
Síðdegis brugðum við okkur svo niður að strönd og fórum í röskan göngutúr á hafnargarði sem þar er. Það er svo frískandi að vera á gangi þarna og hlusta á niðinn í sjónum. Það er oftast talsvert af fólki á gangi þarna og einnig er þarna mikið af veiðimönnum með langar og miklar veiðistangir. Eins og ég sagði förum við nokkuð oft í gönguferð á þessum hafnargarði og þá eru alltaf einhverjir að reyna að veiða, en aldrei hef ég séð þá fá bein úr sjó, svo maður gæti haldið að þeir væru bara að æfa köst.

Með þessum pistli læt ég fylgja mynd af lítilli en fallegri rós, sem Þórunn færði mér úr garðinum í morgunn.

Ný reynsla.

Veður: 4,3°/19,7° léttskýjað.

Með hverjum degi sem líður bætir maður einhverju í sarp reynslu sinnar og þar sem ég á skammt eftir að ná því að hafa lifað í 26000 daga, ætti að vera komið mikið af reynslu í minn sarp og fremur líklegt að um endurtekningar sé að ræða en nýja reynslu úr þessu, en lífið er alltaf að koma manni á óvart. Í dag reyndi ég nokkuð sem ég vonaði að ég slyppi við að upplifa, en það var að verða keyrður niður þar sem ég var að hjóla úti á þjóðvegi.
Ég er margbúinn að segja frá því að ég dáist að því hvað bílstjórar hér hafa verið tillitsamir þegar við erum á hjólunum, láta sig oft hafa að lötra á eftir okkur langar leiðir þar til það er öruggt að þeir geti farið framúr okkur án þess að valda okkur ama. En í dag var komið að því að upplifa hið gagnstæða. Ég var á heimleið eftir að hafa hjólað hér inn Vougadalinn, svona til að sjá hvernig Vouga áin liti út eftir að rennslið í henni hefur aukist eftir úrkomuna að undanförnu. Nú svo var það í smábeygju að ég mætti tveim litlum bílum og varð var við bíl á eftir mér og reiknaði með að hann færi framúr mér þegar bílarnir væru komnir framhjá, en nei þessi gaf sér ekki tíma í slíkt hangs, heldur fór framúr mér um leið og hann mætti bílunum og þar sem ekki var rúm fyrir þrjú farartæki á veginum í einu kaus hann frekar að aka utan í mig en lenda framan á öðrum bíl.
Þetta var stór sendibíll og ég lenti á miðri hlið hans og það var nóg til að ég missti jafnvægið og féll í götuna þegar bíllinn var kominn framhjá mér. Ég hruflaðist aðeins á handlegg og læri, svo minni gátu meiðslin ekki verið. Bílstjórinn stoppaði og kom til að athuga hvort ég væri meiddur og staglaðist sífellt á því hvort ég vildi ekki fara á sjúkrahús og þegar ég leit betur á bílinn skildi ég hvers vegna hann var svona viljugur að koma mér á sjúkrahús, jú þetta var sjúkraflutningabíll sem ók á mig, en ekki með blikkandi ljós eða sírenur í gangi.
Ég afþakkaði alla aðstoð, en bað hann þess í stað að fara aðeins varlegar framvegis, sem ég vona að hann geri.
Ég er búinn að hjóla hér í landi í fimmtán ár án þess að verða fyrir ónæði frá bílum og ef ég fæ frið fyrir þeim næstu fimmtán árin, þá er þetta bara í góðu lagi. Hjólið þurfti að fá aðhlynningu eftir byltuna, því gírarnir urðu fyrir hnjaski, en ég varð ekki var við það fyrr en á heimleiðinni, en þetta eru bara smámunir og það er komið á hjólasjúkrahús og útskrifast á laugardag.