Barir

Veður: 8° / 25° bjart.

Nú eru rósirnar að opna sig hver í kapp við aðra og í fyrradag gat ég fært henni Þórunni minni fyrstu rauðu rósina á þessu vori og í morgunn fékk Rósa líka rauða rós úr garðinum.
Ég sló grasflötina í morgunn, eða það er nær lagi að segja að ég hafi ryksugað hana í leiðinni, því eitt tréð er að endurnýja laufið núna og gamla laufið af því fer um allan garð.
Geiri var á meðan að þvo bílinn sinn og bóna hurðarfölsin á honum. Geiri er mjög vandvirkur við það sem hann gerir og ég er ekki frá því að hann hafi notað eyrnapinna og tannstöngul við þetta verk.
Eftir hádegi fórum við svo með þau til Aveiro til að kenna þeim betur að rata þangað og rata um bæinn, það var aðeins litið í búðir í leiðinni Geiri keypti sér blússu, rauða og fína. Það var talsvert af verslunum opið, þó það væri 1. maí.

Í kvöld fengum við okkur göngutúr til hennar Grösu vinkonu okkar, en hún býr hér skammt frá, er rétt að ljúka við að byggja sér nýtt hús. Við erum búin að þekkja Grösu mjög lengi, því hún tók að sér það erfiða verkefni þegar ég flutti hingað að kenna mér portúgölsku, því hún er kennari. Það verður að segjast að sú kennsla skilaði ekki miklum árangri, en það er ekki kennaranum að kenna að svo tókst til, það verður að skrifast alfarið á nemandann hvernig til tókst.
Á leið okkar til Grösu sáum við að það er búið að opna nýja bar, þó það virðist nú síður en svo hafa verið þöf á því. Þetta er þriðji barinn á leið okkar á um það bið fjögur hundruð metra vegalengd, svo það er varla hætta á að maður deyi úr þorsta á þessari gönguleið.
Það var áður fyrr verslun í þessu húsi þar sem búið er að opna barinn. Í þá tíð voru ekki gluggar á verslunum, heldur voru hurðirnar opnar þegar verið var að versla. Á þessari verslun voru þrjár hurðir og það merkilega er að enn í dag þykir það nauðsynlegt að hurðir að verslum standi opnar á meðan verslunin er opin til afgreiðslu þó nú séu komnir stórir gluggar á slíkt húsnæði. Svona geta venjur orðið sterkar og fólk áttar sig oft ekki á hvernig þær eru tilkomnar.
Það er dótturdóttir kaupmannsins sem byggði þetta hús sem nú er eigandi að því og er búin að gera það upp og er nú komin með litla verslun og bar í húsi afa síns og ömmu.