Veður: 13,4/30,1 hálfskýjað.
Eitt sinn var ég búinn að minnast á að það væri til fyrirmyndar göngu og reiðhjólastígur sem búið væri að leggja eftir gamalli og aflagðri járnbrautalínu meðfram Vougaánni. Síðast þegar ég fór þarna um var þjöppuð möl á stígnum, en þegar ég fór þarna um í dag var búið að bæta um betur og malbika stíginn, svo nú er enn léttara að hjóla eftir honum.
Góður göngu og hjólastígur.
Skemmtilegt vegrið.
Falllegur vegvísir.a
Það er margt sem gleður augað á þessari leið.
Veður: 17,2/30,7° þokuloft fram til hádegis, en léttskýjað síðdegis.
Dagurinn í dag fór dálítið á annan veg, en ég reiknaði með í gærkvöldi þegar ég lagðist á mitt græna og fór að sofa. Númer eitt var að það var þoka í lofti í stað sólskins sem ég hafði búist við í þessum sólarmánuði er það stór plús að fá þoku til að hvíla sig á sólskininu. Næsta atriði var að rafmagnið fór af og var rafmagnslaust í klukkustund, sem kom svo sem ekki að sök, en þriðja og alvarlegasta atriðið var að slanga sem liggur frá dælu í botni brunnsins var rorðin lek. Slangan er raunar búin að vera lek í nokkurn tíma en svo lítið að það kom varla að sök, allavega hummaði ég það fram af mér að gera við hana, þar til í morgunn að lekinn hafði aukist svo mikið að ekki var lengur viðunandi. Brunnurinn er ellefu metra djúpur svo það er talsvert erfitt að ná dælunni upp á yfirborðið, þess vegna hafði ég trassað að gera við lekann eins lengi og mögulegt var. Við Þórunn hjálpuðumst að við að ná dælunni upp og fjarlægja leka bútinn úr slöngunni, og vonuðum að þar með væru þessu verki lokið að þessu sinni. Af fenginni reynslu vorum við ekki neitt sigurviss, því þessi slanga er mesti gallagripur og hefur reynst illa og komið á hana leki hvað eftir annað, en okkur hefur ekki tekist að finna neina slöngu sem er sterkari. Það fór líka svo í morgunn að þrisvar sinnum máttum við hífa dæluna upp áður en yfir lauk, því það kom alltaf fram leki á nýjum stað. Nú er ekki annað að gera en vona það besta og það komi ekki nýtt gat að þessa vandræða slöngu alveg á næstunni.
Gallagripurinn.
Veður: 13,9/33,5° léttskýjað.
Gegnum tíðina hefur oft verið talað um konur sem veikara kynið, en ég held að þetta sé öfugmæli og sennilega tilkomið af því að við karlarnir eigum erfitt með að viðurkenna að við séum veikara og vesælla kynið. Skoðum lítið dæmi, þar sem ég varð að viðurkenna mig sem veikara kynið rétt einu sinni enn. Svo er mál með vexti að ég geng jafnan með axlatösku sem ég geimi í gleraugun mí, lítinn sjónauka og ýmislegt smádót sem ég þarf á að halda vegna minnar sjónskerðingar og þar að auki er ég jafnan með myndavél í töskunni, því maður veit aldrei fyrirfram hvenær eitthvað ber fyrir augu sem manni langar til að taka mynd af. Núna á dögunum fékk ég mér minni myndavél og nettari en ég hef átt, svo ég gat minnkað töskuna sem ég nota undir dótið mitt. Þórunn bauð mér að nota eitt af sínum veskjum sem var hæfilega stórt til þessa brúks, en mér fannst það vera grunsamlega þungt miðað við stærð, enda kom í ljós þegar ég fór að skoða það að leðrið í því var mjög þykkt og axlarólin þvengmjó, svo mér fannst sem hún gæti rist mig í sundur, en þetta veski var Þórunn búin að bera með bros á vör og fannst bara þægilegt. Í dag fórum við svo í kínverska búð og keyptum létt veski með breiðri ól, svo nú þarf ég ekki lengur að kvarta og kveina undan byrðinni sem ég ber. Hvort kynið er svo það veikara??????
Alvöru leðurveski og kínversk tuðra hlið við hlið.
Veður: 15,8/27,2° úrkoma 2,7 mm. Alskýjað í dag og smávegis rignin.
Nú verð ég að reyna að setja upp spekingssvip eins og Trausti veðurfræðingur þegar hann er spurður um hitatölur mánaðarins, því nú birti ég tölur júlimánaðar.
Það var mikill munur á milli lægsta og hæsta hita 5,5°/39,7° og meðaltalið af þessu verður 22,4. Úrkoman mældist 13,8mm.
Veður: 14/30,1° úrkoma 1,4 mm. Þessi úrkoma féll seint í gærkvöld og í morgunn, en í dag var að mestu léttskýjað.
Í gær ferðuðumst við inn í land um dali og fjöll, til mótvægis fórum við í dag niður að sjó. Það er orðið margt um manninn á baðströndunum núna, en enn fleira fólk verður að sóla sig þegar ágústmánuður gengur í garð. Ágústmánuður er aðal sumarleifismánuðurinn hér í landi. Læt fylgja neð nokkrar myndir til að sýna stemminguna við sjóinn í dag.
Hér nýtur fólk góða veðursins.
Veiðimennirnir slógu ekki slöku við, þó aflinn væri í engu samræmi við eljusemina.
Aðrir þutu um á hraðskreiðum bátum.
Vitinn fylgdist með öllu saman og gat sig hvergi hreyft.
Veður: 13,1/31,2° úrkoma 0,7mm. skýjað í morgunn, en að mestu léttskýjað um miðjan daginn, þykknaði upp undir kvöld og náði meira að segja að rigna í kvöld.
Sunnudagsferðinni að þessu sinni var heitið til bæjar sem heitir St Comba Dao og auk þess að vera skemmtilegur og skoðunarverður bær með gömlum húsum tengist hann sögu Portúgals sterkum böndum, því í þessum bæ er síðasti einræðisherra Portúgals fæddur.
Eitt sinn þegar við vorum á ferð í þessum bæ borðuðum við á skemmtilegu veitingahúsi, sem staðsett var í gömlu húsi og var mjög sérstakt í útliti að innan. Við ákváðum að borða þarna aftur í dag, en komum þá að lokuðum dyrum og þegar við könnuðum málið kom í ljós að staðurinn er búinn að vera lokaður lengi. Þegar við spurðumst fyrir um annann veitingastað var mælt með stað sem er í sundhöll bæjarins og þangað héldum við. Þessi staður var hinn ágætasti og með fallegt útsýni yfir nágrennið, en var ekki eins eftirminnilegur og staðurinn í gamla húsinu. Maturinn og þjónustan var góð, þó umgjörðin væri önnur. Eftir matinn fórum við í skoðunarferð um bæinn, en völdum svo aðra leið heim en við komum til bæjarins. Ákváðum að koma við í bæ sem heitir penacova, því hann er í fallegu umhverfi upp til fjalla og útsýnið frá bænum er alveg frábært.
Horft að kirkjunni í St. Comba Dao.
Útsýni af bæjartorginu í Penacova.
Veður: 18/32,3° slatti af skýjum á himinhvolfinu af og til, en bjart þess á milli.
Unnum í garðinum í morgunn við snyrtingu, eins og venjulega fór mest af tímanum í að fjarlægja arfa. Nú svo þarf líka að klippa til blóm og setja stuðning við þau blóm sem eru hávaxinn, grasflötin var líka sleginn og sitt hvað fleira smálegt sem ekki tekur að minnast á. Við verðlaunuðum okkur svo fyrir dugnaðinn með því að fara á kaffihús síðdegis.
Veður: 17,8/25,9° úrkoma 4,8 mm. Alskýjað.
Það er fremur sjaldgæft að það rigni hér í lok júlí, en samt sem áður er það staðreind að það rigndi í morgunn og svo gerði aðra skúr um hádegi. Sennilegasta skíringin á þessari óvæntu úrkomu er sú að vinkona okkar hér er á ferðalagi núna og það bregst varla að hún fái rigningu þegar hún fer í frí. Sumir virðast bara einfaldlega vera óveðurskrákur.
Í morgunn var síðasti leikfimitími fyrir sumarfrí og leikfimin hefst svo að nýju þann 4. September. Vonandi verð ég duglegur að hjóla og ganga á meðan fríið í leikfiminni er til að haldaa aðeins í horfinu með hreifingu.
Veður: 12,5/30,9° smávegis skýjað af og til.
Í síðustu viku þegar við fórum í ferðalagið hér suður í land, þá ókum við eftir nýrri hraðbraut. Þessi hraðbraut er uppbygð á sama hátt og allar aðrar hraðbrauti, ýmist grafnar geilar ofan í hæðir eða byggðar brýr yfir heilu dalina. Á einum stað lá hraðbrautin meðfram og síðan yfir hrísgrjónaræktarsvæði. Ég hafði séð svæði hingað og þangað um landið þar sem eru ræktuð hrísgrjón , en gerði mér ekki grein fyrir að það væri ræktað á svona stóru svæði eins og ég sá þarna. Við ákváðum þegar við sáum þetta svæði að fara og skoða það nánar og það gerðum við í dag. Það var gaman að aka meðfram hrísgrjónaekrunum og geta farið út úrr bílnum og virt ræktunina fyrir sér í nærmynd. Það var ekki síður fróðlegt að aka undir hraðbrautina þar sem hún lá þvert yfir akurlendið og sjá hversu gríðarlegt mannvirki er þarna um að ræða.
Hrísgrjónaræktun.
Hrísgrjón og hraðbrautin yfir akurinn.
Undir hraðbrautinni.
Veður: 15,9/34,5° þokuloft fyrst í morgun, en síðan léttskýjað.
Þá er komið að því að segja frá síðari degi ferðalagsins okkar í vikunni sem nú er nýbúin að kveðja. Þennan dag ákváðum við að fara lítið eitt lengra til suðurs í lítið þorp sem heitir Sobreiro, því þar er staðsett mjög merkilegt og sérstakt safn. Mér finnst fremur leiðinlegt að skoða söfn, en það gegnir öðru máli með þetta safn, því það er einhvern veginn meira lifandi en venjuleg söfn. Safnið er í mörgum litlum húsum og svo er líka eftirlíkingar af þorpi þar sem eru brúður við ýmis störf. Það eru líka brúður og sumar í fullri stærð þar sem líkt er eftir íveruhúsum fólks fyrir svo sem rúmum eitt hundrað árum. Malarafjölskyldan er í sínu húsi með þá húsmuni í kring um sig sem þá tíðkuðust. Skraddarinn er við sína iðju og sömuleiðis úrsmiðurinn og ýmsir fleirri. Þarna er lítil kirkja, járnsmiðja, trésmiðja,bakarí, bjórstofa, verslun, skóli, bátur og veiðarfæri. Þetta er sem sé safn um forna lifnaðarhætti og hvernig fól bjó og verkfærin sem notu voru á þeim tíma. Maðurinn sem stofnaði þetta safn er enn á lífi 86ára gamall. Hann var leirkerasmiður, en jafnframt svona mikill safnari og vildi leyfa öðrum að njóta þess með sér. Fjölskyldan vinnur enn við leirmunaframleiðslu og er með verslun þarna á svæðinu,þar sem hægt er að kaupa leirmuni frá þeim og fleirri aðilum. Brauðgerðin er líka starfrækt og þar keyptum við brauð framleitt eftir gömlum hefðum. Læt eina mynd úr safninu hér á síðuna, en fleirri myndir er hægt að sjá með því að smella á „Myndir“ hér til hæri á síðunni.
Skraddarinn að störfum.
Veður: 12,9/38,9° léttskýjað.
Það er margskonar ávinningur af því að ferðast, fyrst og fremst sér maður annað landslag og umhverfi en heima hjá sér, svo sér maður líka annað mannlíf, borðar annann mat en venjulega og síðast en ekki síst þá er svo gott að koma heim aftur og njóta alls þess sem heimili manns og næsta nágrenni hefur að bjóða. Ferðalögum fylgir smávegis óvissa, þó búið sé að skipuleggja ferðalagið þá gengur ekki alltaf allt eins og ráð var fyrir gert, það fengum við að reyna í síðasta ferðalagi. Áður en við lögðum af stað var ég að spá í hvar við myndum gista og fór á netið til að sjá hvað væri í boði. Jú ég fann heimasíðu þar sem boðin var gisting í gömlu og virðulegu húsi. Það voru flottar myndir af umhverfinu, fallegur garður og að því er virtist glæsileg herbergi. Sem betur fer var ekki hægt að panta gistinguna á netinu, en það var gefið upp símanúmer. Þórunn hringdi og pantaði gistinguna og það var nokkur eftirvænting að gista á að því er virtist í svona veglegu húsi í fallegu umhverfi. Eftir að hafa spurt til vegar fundum við staðinn, en ekki var heimreiðin glæsileg, malarvegur og þyrnigróður beggja vegna vegarins, sem við vorum hálfsmeik um að myndi rispa bílinn, en sem betur fer slapp bíllinn óskemmdur. Heim að húsinu komumst við, jú það var rétt að garðurinn umhverfis var snyrtilegur og húsið ágætlega málað, að undanskyldum hurðum og gluggum. Þegar þarna var komið sögu var mesti glansinn farinn af að gista þarna, en við höfðum gert okkur talsvert háar vonir um glæsilega gistingu og öðruvísi en á nýtísku hóteli. Eftir nokkra leit tókst okkur að finna móttökuna, sem var á jarðhæð og síður en svo glæsileg og ekki bætti úr fúkkalyktin sem var þarna inni. Á endanum fannst svo bjalla og eftir nokkra bið kom kona til að afgreiða okkur. Það stóð heima að við áttum pantaða gistingu þarna, sem við afþökkuðum með það sama. Konan mátti eiga það að hún tók afpöntuninni ljúfmannlega og vísaði okkur á greiðfærari veg til baka. Nú áttum við enga gistingu vísa fyrir nóttina, en höfðum svo sem ekki stórar áhyggjur af að finna ekki sama stað til að gista. Á firsta hóteli sem við komum var laust herbergi, gott hótel með öllum nútíma þægindum og án fúkkalyktar.. Segir ekki einhvers staðar að enginn ráði sínum næturstað, allavega varð okkar næturstaður annar en við höfðum ráðgert þessa nótt.
Þetta hótel reyndist vel.
Veður: í gær 16-7 12/38,7° léttskýjað, í dag 17,
-7 12,7/35,7° léttskýjað.
Við vorum á ferðalagi hér í Portúgal í gær og í dag og hver veit nema að ég segji eitthvað frá ferðalaginu við tækifæri. Læt fylgja hér með myndir sem ég tók í ferðinni af klettóttri strönd og manni við veiðar á þeirri sömu strönd.
Hér má sjá árangur af löngu starfi sjávar og veðurs.
Veiðimenn eru samir við sig hvert sem umhverfið er.
Veður: 12/39,7° léttskýjað.
Nú erum við búin að taka upp laukinn, en eigum þá eftir að flétta hann saman á blöðunum, svo hægt sé að hengja hann upp til vetrargeimslu. Sprettan í ár var í góðu meðallagi. Ein mynd til að sýna hvað nýupptekinn laukur er fallegur.
Veður: 8,4/36,7° léttskýjað.
Notuðum daginn í dag til að víggirða kotið fyrir köttum, því það hefur margsinnis borið við að kettir kæmu hér inn óboðnir, þegar eldhúsdyrnar eru opnar. Fórum í morgunn og keyptum acrylplötu og lamir á hana til að setja utan við hurðina að neðanverðu. Ég set mynd af þessu hér fyrir neðan, myndin segir meira en mörg orð. Við þurftum að fara tvær ferðir til að fá réttar lamir á þetta, því ég athugaði ekki í byrjun að það er ekki sama hvort hlerinn á að opnast til hægri eða vinstri, en nú veit ég betur.
Það er oft undarlegt hvernig maður hagar sér með að kaupa hluti, eða kaupa ekki hluti. Ég hef aldrei látið verða af því að kaupa mér handhæga borvél, af því ég á borvél sem er stór og oft óhentug og hef svo sem komist af með að nota hana. Á sama tíma er búið að kaupa tölvur í stórum stíl og margt annað sem er mikið dýrara og hefði vel verið hægt að vera án. Semsagt í morgunn þegar þessi stórframkvæmd var framundan var ákveðið að fjárfesta í lipurri borvél og þvílíkur munur að vera með þægilegt verkfæri í höndunum. Þetta var fjárfesting upp á heilar 29 evrur. Eftir á skil ég ekki hvers vegna þetta verkfæri var ekki keypt fyrir 25 árum.
Hér er hlerinn upp við vegginn, þegar ekki þarf að nota hann.
Hér er hlerinn fyrir dyraopinu og hurðin opin til að fá inn ferskt loft, en ekki óboðna ketti.
Veður: 17,2/25,9° úrkoma 1,4 mm.skýjað fram eftir degi, en létti til undir kvöld.
Ég sagði frá því í gær að við værum kominn með kött í fóstur og að hann ætti að halda sig utandyra, en allir sem þekkja til katta vita að þeir vilja fara sínar eigin leiðir og erfitt að treysta þeim. Það hefur nokkuð oft komið fyrir að þeir litu hér inn ef þeir áttu leið um, ef eldhúsdyrnar hafa verið opnar,sem þær eru mjög oft á sumrin. Við höfum oft rætt um að fá eitthvert net eða spjald fyrir dyraopið að neðanverðu, til að geta haft opið út án þess að eiga á hættu að fá inn óboðna gesti og nú verður þeirri hugmynd komið í framkvæmd fljótlega. Þegar ég læsti eldhúsdyrunum í gær kvöldikom ég hvergi auga á kisa, svo ég litaðist lauslega um hér inni en sá hann ekki þar, svo ég taldi að hann hefði brugðið sér frá í embættisierindum, en svo reyndist ekki vera. Þegar ég kom inn á bað í morgunn mætti ég kisa með stýrið upp í loftið og ekkert nema vinskapurinn og sjálfsagt búinn að sofa vært hér inni í nótt. Það er greinilega ekki hægt að treysta honum frekar en öðrum köttum.
Veður: 12,3/32,5° að mestu léttskýjað.
Við tókum góða stund í morgunn að vera í bændaleik, byrja á að taka upp laukinn, en uppskeran af lauk virðist vera í meðallagi. Nú svo þurfti að binda tómatana, því tómatplönturnar þurfa stuðning, það er stutt í að við getum farið að borða tómata úr garðinum. Ávaxtatrén fengu nammi að borða, það er að segja áburð og vökvun.
Það hafa oftast verið kettir til heimilis hér í Austurkoti, þeir hafa allir gefið sig fram sem sjálfboðaliða og þegið mat að launum, sá fyrsti fékk líka húsaskjól, en þeir sem á eftir komu hafa orðið að halda sig utandyra.. Þetta hafa yfirleitt verið villikettir, en flestir hafa orðið gæfir með tímanum. Heimilið er búið að vera kattarlaust nú í tvo mánuði og ég saknaði þess að hafa ekki kött, því mér finnst þeir vera svo vinalegir. Í síðustu viku gaf sig fram nýr sjálfboðaliði, alveg grindhoraður og nær dauða en lífi af hungri. Þetta er fyrrverandi heimilisköttur, því hann mjálmar og vill láta gæla við sig. Þó hann væri að farast úr hungri þóttist hann hafa efni á að vera matvandur. Nú er búið að baða kisa, en það verk tók hún kristín sem var gestur hér að sér. Kisi kvartaði á meðan á baðinu stóð, en virtist vera nokkuð sáttur þegar því var lokið.
Veður: 5,5/30,3° léttskýjað.
Í dag vorum við í túrhesta leik með gestum okkar þeim Kristínu og Eiði. Við skoðuðum háskólabæinn Coimbra, sem er mjög skemmtileg borg og margt þar til að skoða, eftirminnilegast var að skoða háskólabókasafnið. Frá Coimbra héldum við til Conimbrica til að skoða rústur frá þ´vi rómverjar réðu ríkjum í Portúgal, Þar eru varðveitt mjög falleg mósaíkgólf. Næsti viðkomustaður var svo Figueira do Foz og það var jafnframt síðasti viðkomustaður á þessu góða ferðalagi.
Veður: 13,8/29,8° úrkoma 0,7 mm. Gerði smáskúr í gærkveldi sem kemur með mælingunni í dag. Í dag var að mestu léttskýjað.
Veður: 7,1/28,8° léttskýjað.
Einu gestir sumarsins frá Íslandi sem við eigum von á að fá í sumar skiluðu sér hingað í gærkvöldi eftir akstur yfir þveran Íberíuskagann. Það verður ánægjulegt að fá að hafa félagsskap þeirra næstu daga.
Veður: 16,7/25,5° úrkoma 1,4mm. Að mestu skýjað fram eftir degi, en léttskýjað undir kvöld.
Þetta er fyrsta úrkomumælingin síðan ég fékk veðurstöðina með regnmæli og öllu tilheyrandi. Eins og sjá má á mælingunni er þetta mun nákvæmari mæling, en þegar ég var að setja tommustokk ofan í mælikerið og renna svo fingri niður eftir tommustokknum, þar til ég fann að fingurinn var kominn í vatnið og því næst lá leiðin til Þórunnar sem las af tommustokknum. Eins og gefur að skilja stenst þessi aðferð með tommustokk ekki samanburð hvað nákvæmni varðar við tölvutengdan regnmæli, en gerði samt sitt gagn.
Veður: 16,2/31,3° léttskýjað
Þessa mynd af afsagaðri grein tók ég á ú´tivistarsvæðinu í Vagos síðastliðinn sunnudag.
Veður: 11,4/34,5° morgunþoka/léttskýjað.
Hér fyrir neðan eru niðurstöðutölur fyrir veðrið í júní´
Í efstu línu til vinstri er meðaltal lágmarkshita, því næst er meðaltal hámarkshita og því næst úrkoman sem var aðeins 14mm. Í miðlínunni er meðalhitinn og neðst er svo lægsti og hæsti hiti.
Veður: 11,9/35,1° morgunþoka/léttskýjað.
Hjónin í Frosos buðu okkur með sér og fjölskyldunni í skógarferð í dag. Þetta var eiginlega dálítið eins og óvissuferð fyrir okkur, því við vissum lítið meira en að það ætti að vera í skugga trjáa fyrir sólinni og að skógurinn væri í nágrenni við bæ sem heitir Vagos og er í um það bil 20Km. fjarlægð héðan. Við höfðum áður komið á útivistarsvæði í nágrenni Vagos, þar sem eru stór tré og venjulegur skógarbotn og við töldum að þangað væri förinni heitið í dag, en svo var ekki. Okkur var sagt að mæta í Frosos klukkan tíu sem við og gerðum. Þar kom húsmóðirin til dyra og settist inn í bílinn hjá okkur og vísaði veginn að kirkju bæjarins, þar sem við þurftum að bíða smástund eftir að messu lyki og bóndinn væri tilbúin til að koma með okkur, en hann syngur í kirkjukórnum. Það kom í ljós að aðrir úr fjölskyldunni fóru fyrr um morguninn með mat og annan búnað til að tryggja sér pláss á góðum stað. Þau hjón vísuðu svo veginn á staðinn á leiðarenda kom í ljós að þetta er útivistarsvæði við kirkju og síðar um daginn átti að vera guðþjónusta fyrir prófastdæmið. Slík samkoma er einu sinni á ári, síðustu helgina í júní. Kirkjukórarnir frá öllum kirkjunum syngja saman og ég heyrði þegar söngstjórinn var að æfa þá rétt áður en guðþjónustan byrjaði og það þurfti að endurtaka hale lú ja mjög oft áður en rétta tóninum var náð og getur verið að svo hafi verið með fleiri atriði,en þetta var það sem ég heyrði á minni göngu um svæðið. Þarna er góð aðstaða til útiveru sléttar og fínar grasflatir og borð og bekkir í skugga trjánna til afnota fyrir fólk. Það þarf auðvitað ekki að taka það fram að þarna var að hætti Portúgala verið með allt of mikinn mat á boðstólum. Tengdasonur hjónanna sem búinn er að vera í Englandi er kominn með þá sýn á hve mikið er borið fram við svona tækifæri „afgangurinn verður að vera nægur fyrir fjölskylduna að minnsta kosti í eina viku, annað er nánasarlegt“, sagði hann. Þórunn bjó til ostaköku, sem við lögðum á borð með okkur og þó hún líkaði vel að þá eigum við afgang en aðeins í einn eða tvo daga, svo við eigum margt ólært hér.
Tengdasonurinn við grillið.
Góð aðstaða til að borða.
Ekki auðvelt að ná rétta tóninum í hal e lú ja.
Veður: 12,7/35,3 léttskýjað.
Eins og sjá má á hitatölunum hér fyrir ofan er orðið vel hlýtt um miðjan daginn og ef eitthvað á að gera í garðinum er best að drífa það að morgni til eða á kvöldin. Það er oft mikill munur á hita hér í dalnum og niður við strönd, það sannreyndum við í dag. Þegar við fórum héðan var hitinn vel yfir 30°, en þegar við komum niður á strönd var bara 22° hiti og talsverð hafgola. Þessi hiti var í það minnsta fyrir mig svo við röltum aðallega um götur sem voru í skjóli fyrir hafgolunni. Það var líka fremur fátt fólk á ströndinni.
Ekki þrengsli á þessari strönd
Veður: 16,7°/29,3° léttskýjað.
Baðvogin okkar, sem er talandi, því ég sé ekki tölurnar sem birtast á skjánum hefur undanfarið verið að koma sér í mjúkinn hjá okkur með því að segja lægri tölu en okkur hefur fundist eðlilegt. Þórunn hefur verið hörð á því að þetta stæðist ekki, því fötin hennar segðu annað. Talandi baðvog gátum við hvergi fundið hér í verslunum, svo það var farið á netið og í dag kom ný vog í húsið alla leið frá Austurríki. Því miður reyndist grunur okkar um að sú gamla væri ekki alveg með fullum fimm vera á rökum reystur, því þessi nýja sýnir þá´vigt sem við héldum að ætti að vera. Nýja vigtin talar mjög skírt og það þíðir ekkert að þykjast ekki heyra almennilega það sem hún segir, því hún endurtekur tölurnar þrisvar sinnum auk þess sem skjárinn er með mjög stórum og skírum stöfum. Það verður fróðlegt að heyra tuðið í vigtinni í fyrramálið, við vorum búin að ákveða að fara út að borða á morgunn og því verður ekki breytt hvað sem vigtin segir.
Sú er ekki að reyna að koma sér í mjúkinn hjá manni þessi vog.
Veður: 15,9°/30,8° skýjað fram yfir hádegi, en orðið heiðskírt um klukkan þrjú.
Í dag vorum við boðin í mat til vinahjóna okkar úr leikfiminni, en þau búa í bæ sem heitir Frosos . Þarna var stórfjölskyldan mætt í mat ásamt okkur og hjónum sem tengd eru tengdasyni hjónanna sem buðu okkur í mat. Stórfjölskyldan var stærri núna en í firri boðum, því dóttir hjónanna og tengdasonur ásamt tveggja ára dóttur eru flutt heim til Portúgals eftir þriggja hálfs árs veru í Englandi. Þau höfðu mun hærri laun í Englandi en hér og sögðust hafa getað lagt fyrir 2000 evrur á mánuði og þegar þau voru búin að safna það miklu að þau gætu keypt sér hús hér fluttu þau hingað á ný. Þau reikna með að geta flutt í húsið í haust, en þau keyptu lítið hús sem þau eru búin að endurbyggja og stækka. Þau sýndu okkur húsið, sem hentar þeim mjög vel og er ekki brjálæðislega stórt eins og mörg ný hús hér. Gestgjafar okkar eiga líka tvo syni, sem báðir bjuggu hjá foreldrunum síðast þegar við vorum þarna í boði, því þeim sem hafði verið í sambúð hafði verið skilað aftur, en það var bara tímabundið, sennilega svona hvíldarinnlögn, allavega búa þau saman núna.
Þórunn ásamt ungu hjónunum við nýja húsið þeirra..
Síðdegis fórum við svo að kirkjunni hér í dalnum, því þar var Joana vinkona okkar þátttakandi í einskonar skólaslitum á vetrarstarfi kirkjunnar. Það var komið fyrir leiksviði og bekkjum á bílaplani við kirkjuna og þar tróðu krakkarnir upp með ýmiss skemmtiatriði.
Áhorfendur og sér aðeins í leiksviðið lengst til hægri.
Atriði á sviðinu.
Veður: 13,5°/32,9°. Það er fastur liður núna þessa síðustu daga að byrja daginn með morgunþoku, sem sólin er búin að fjarlægja um tíuleitið og eftir það er heiður himinn.
Veður: 14,1°/32,7° þoka í lofti fyrst í morgunn, en síðan léttskýjað.
Nú er ég búinn að fá nýtt leikfang, sem mig hefur lengi dreymt um að eignast, en hefur verið neðarlega á forgangslistanum. Ég hef alltaf haft mikinn áhuga fyrir veðurfari og veðurspám og upp á síðkastið hef ég haldið dagbók yfir veðurfarið hér í Austurkoti. Nú sem sé lét ég verða af því að kaupa veðurstöð sem gerir mér kleift að fá nánari og nákvæmari upplýsingar um veðrið hér og færa það beint inn í tölvuna, þar sem gögnin eru aðgengileg hvenær sem er. Þarna er síriti fyrir hita og rakastig úti og inni, vindur, vindhraði og vindátt, loftþrýstingur og ótal matg sem áhugavert er fyrir veðurvita að kanna.
Einn af möguleikunum til að skoða í tölvunni.
Innistöðin
Vindmælirinn.
Veður: 5,1°/31,9° heiðskírt.
Það er merkilegt til þess að hugsa að enn í dag skuli vera til kvenréttindadagur og full þörf á honum sem slíkum, því enn er mikið misrétti við líði. Það er okkur strákunum til háborinnar skammar að það skuli vera þörf á svona áminningu enn í dag. Að sjálfsögðu héldum við daginn hátíðlegan með því að fara út að borða og því til sönnunar er hér mynd af Þórunni við matardiskinn.
Veður: 16,5°/24,1° úrkoma 12 mm. Regnskúrir og sól til skiptis fram undir kaffi, en þá náði sólin yfirhöndinni.
Það kannast örugglega margir við horteinsíu sem pottablóm, en hér fær hún að vaxa úti og þá verður hún risastór. Því til sönnunar set ég með þessum pistli tvær myndir sem ég tók í dag af horteinsíunum í garðinum okkar.
Veður: 10,4°/29,2° léttskýjað.
Eins og gerst hafi í gær, var kveðið í dægurlagatexta hér í denn, Þetta textabrot kemur oft upp í huga minn og meðal annars í dag þegar við Þórunn minntumst þess að í dag eru átta ár síðan hún flutti hingað í Austurkot. Mér finnst við hafa átt svo góða daga saman hér og þá finnst manni tíminn líða svo hratt að ósjálfrátt dettur manni í hug að það geti varla staðist að árin séu svona mörg, en þegar litið er á dagatalið blasa staðreyndirnar við.
Veður: 12,3°/31,1° léttskýjað
13. júní er dagur heilags Antoníusar og þar sem þessi bæjarhluti heitir í höfuðið á þeim dýrlingi þá er haldin guðþjónusta í kapellunni sem heitir í höfuðið á honum. Að lokinni guðþjónustunni, sem hefst klukkan sjö síðdegis er farið í skrúðgöngu með líkneski af Antonío og Maríu um 200 metra leið að barnaskólanum og aftur að kapellunni. Á leiðinni eru kyrjaðar Maríubænir og sungnir sálmar. Gatan sem gengið er eftir er stráð blómum. Þegar kirkjuathöfninni er lokið koma börnin í leik og barnaskólanum í skrúðgöngu frá skólanum að kirkjunni við undirleik hljómsveitar. Það er engin hætta á að hljómsveitin ruglist í hvaða lag á að spila, því það er aðeins leikið eitt lag, sem er endurtekið í sífellu og þannig er það á hverju ári, hver sem hljómsveitin er.
Hér eru þau Antónío og María á blómumskrýddum börum, sem þau voru borin á í skrðúðgöngunni. Þau fá bara að fara þessa einu ferð á hverju ári.
Blóm á götunni.
Hér er María í sinni árlegu reisu.
Skólabörnin á leið sinni frá skólanum að kapellunni. Það voru saumaðir nýjir búningar á þau öll í ár.
Veður: 31,9°/13,3° léttskýjað.
Verkefni morgunsins var að fjarlægja greinar af pálmunum, en það geri ég tvisvar til þrisvar sinnum á ári og þá tíu til tuttugu neðstu greinarnar hverju sinni. Pálmarnir eru dálítið sérstæð tré, því þeir koma með nýjar greinar inn í miðju, en svo loka þeir fyrir næringu í neðstu greinarnar og þá fúna þær mjög fljótt og detta þá af, en mér finnst svo ljótt að hafa visnað greinar að ég fjarlægi þær fljótlega eftir að þær fara að visna, en endinn sem er fjærst stofninum visnar fyrst.
Pálmarnir eftir snyrtinguna.
Í dag buðum við nágrönnum okkar þeim Mathild og Manúel út að borða á veitingastað sem býður upp á hlaðborð í hádeginum með ódýrum og góðum mat. Þau hafa sig aldrei í að gera neitt líkt þessu til að fá tilbreytingu í hversdaginn, svo við ákváðum að kynna þeim þennan möguleika og þau voru mjög ánægð með þessa ferð og líkaði maturinn reglulega vel. Á eftir matinn var svo farið í búðarrölt, svona til að skoða, en lítið var verslað.
Setið að snæðingi.
Veður: 10,5°/32° léttskýjað.
Í morgunn klippti ég hekkin í garðinum. Síðdegis ætluðum við að koma pakka í póst, en sáum þá að pósthúsið og allar verslanir voru lokaðar, svo það er á hreinu að við fylgjumst ekki með hvenær eru frídagar hér, þegar við spurðum svo innfædda hverju þetta sætti að allt væri lokað kom í ljós að aþð er þjóhátíðardagur hér í dag, einn af þrem slíkum hér á hverju ári.
Nú hefur Þórunn lokið við mósaíkkið á vegginn hér á veröndinni og af því tilefni set ég inn myndir af henni að vinna að verkinu.
Hér er þórunn að líma flísarnar.
Hér er hún að leggja síðustu hönd á verkið.
Tvær af myndunum.
Veður: 10,2°/32° léttskýjað.
Það rann upp fyrir mér í morgunn þegar ég var að þrífa bílaplanið okkar með háþrýstiþvottavél og það spýttust á mig óhreinindi að það er oft talsverð óþrifavinna að þrífa hjá sér og gera fínt. En nú er sem sé búið að sementsþvo bílaplanið, svo það lítur vel út og ég er líka þveginn og strokinn eftir að hafa farið í bað að loknum þrifunum á planinu.
Veður: 8,1°/31,2° léttskýjað.
Eins og ráða má af hitatölunum hér fyrir ofan er nú orðið notalega hlýtt hér um miðjan daginn og því eins gott að vera ekkert að drolla inni á morgnana, ef það er ætlunin að vinna úti við. Þar af leiðandi vorum við komin út til vinnu klukkan hálfníu í morgunn, Þórunn til að vinna við mósaíkkið á vegginn og ég til að ljúka við að mála vegginn í kring um garðinn.
Veður: 8°/26,6° þoka í lofti fyrst í morgunn og meira að segja örfáir regndropar, en orðið léttskýjað um hádegi.
Það mjakast áfram hjá mér að mála vegginn í kring um garðinn hjá okkur og í dag lauk ég við að mála hann að innanverðu, en enn á ég nokkuð ómálað að utanverðu. Ég nota kalk á hluta veggjarins að innanverðu því hann er svo ósléttur sumstaðar. Þeir sem ráða veðrinu hér reyndu að taka mig á taugum í morgunn, því þegar ég var að ljúka við að kalka vegginn kom smávegis þokuúði, en sem betur fer var það svo lítið að það sakaði ekki.
Veggurinn nýmálaður, það verður nú að hafa falllega umgerð um rósirnar.
Veður: 7,6°/25,7° Léttskýjað fyrst í morgunn, síðan kom stutt tímabil með þunnri þokuslæðu á himni og síðdegis á ný léttskýjað.
Þegar ég var í skóla hér í þá eldgömlu daga sem flestir eru löngu búnir að gleyma, en samt sem áður man ég enn þegar ég las um kínverska múrinn og kennarinn útlistaði að hann væri svo stór að hann sæist meira að segja utan úr geimnum, þetta fundust mér vera undur og stórmerki. Þessu skaut upp í hug mér í dag þegar ég var að mála múrinn í kring um lóðina okkar , sá múr stenst auðvitað ekki samjöfnuð við kínverska múrinn, en sést samt utan úr geimnum eins og sagt var um þann Kínverska forðum daga. En að þessi litli múr hér skuli greinast á myndum utan úr geimnum segir mikið um framfarir í tækni að það skuli vera hægt að greina svona lítinn vegg á Google earth. Ég læt fylgja hér með eina mynd sem ég tók á jörðu niðri til að sýna hvernig múrinn var látinn sveigja eftir götunni, þegar hann var byggður fyrir meira en eitt hundrað árum.
